"Polisə Dəstək" İB növbədənkənar ümumi yığıncağını keçirib. Yığıncaqda 2016-cı il ərzində görülən işlərə yekun vurulub, sədrin hesabatı dinlənib.
Sonra ümumi yığıncağın qərarı ilə Şəmsəddin Əliyev yenidən Birliyin sədri seçilib. İdarə heyətinin yeni tərkibi və MTK-nın üzvləri də yenilənib, bu barədə Ədliyyə Nazirliyinə məlumat verilib. 2017-ci ildə Azərbaycanda keçiriləcək İslam həmrəyliyi idman oyunlarında iştirak edəcək "Polisə Dəstək" İB-nin gənc könüllülərin siyahısı diqqətə çatdırılıb və qəbul edilib.
Yığıncaq iştirakçıları təşkilatın cinayətkarlıqla mübarizənin həyata keçirilməsi sahəsində əhalinin maarifləndirilməsi missiyasını qənaətbəxş hesab edib.
Azərbaycan Respublikasının Prezidenti yanında QHT-lərə Dövlət Dəstəyi Şurasının maliyə dəstəyilə hazırlanmış "Terrorizm-XXI əsrin müharibəsi", "İnsan alverinə qarşı mübarizə"nin istiqamətlərini əks etdirən iki kitabça çap edilərək vətəndaşlara paylanıb. 20-dən çox akademik məqalə KİV-də dərc edilib. Belə yazılara- "Məişət zorakılıqları", "Narkomanlığın aradan qaldırılmasına təkliflər", "Narkomaniya və HİV-lə mübarizəyə tarixi baxış" (10.397 dəfə oxunub), "Narkomaniyanın cəmiyyətdəki fəsadları" (15.786 dəfə oxunub), "Vətənə sədaqət korrupsiyaya yox deməkdir" (69.767 dəfə oxunub), "Cinayətkarlığın vəziyyəti zamana görə dəyişir" (2578 dəfə oxunub); "Məişət zorakılıqlarını doğuran səbəblər və aradan qaldırılması yolları" (8928 dəfə oxunub) nəzəri və praktiki yazılara ehtiyac duyulduğundan gündəmdədir.
Ümumilikdə, cinayətkarlığa qarşı mübarizəyə dair dərc olunmuş yazılardan faydalananların sayı 127.468 nəfərə çatıb və hər gün artımla müşahidə edilir. İctimai Birliyin sədri Şəmsəddin Əliyev ölkədə cinayətkarlıqla mübarizə siyasətinin həyata keçirilməsinin hər bir vətəndaşın konstitusion borcu olduğunu diqqətə çatdırıb.
Baki-xeber.com
