Ramiz Tağıyev: "Biz istərdik ki, diasporumuzun fəallığı daha da artsın"
Prezident İlham Əliyev Dünya Azərbaycanlılarının Həmrəyliyi Günü və Yeni il münasibətilə bütün soydaşlarımızı təbrik edərək, onların hər birinə firavan həyat və işlərində müvəffəqiyyətlər arzulayıb.
Prezidentin ictimai-siyasi məsələlər üzrə köməkçisi Əli Həsənov xarici ölkələrdə yaşayan azərbaycanlılarla bağlı müzakirələrə münasibət bildirərkən deyib ki, Prezident İlham Əliyev də mərhum prezident Heydər Əliyevin xaricdə yaşayan soydaşlarımızla bağlı həyata keçirdiyi siyasətə həmişə sadiqliyini nümayiş etdirir və həmvətənlərimizlə bağlı məsələlərə prinsipial şəkildə yanaşaraq, onları daim diqqət mərkəzində saxlayır: "Cənab Prezident Dünya Azərbaycanlılarının II Qurultayındakı çıxışında qeyd edib ki, dünyada yaşayan soydaşlarımız təşkilatlanır, yaşadıqları ölkələrin həyatında daha da fəal rol oynayırlar. Prezident qeyd edib ki, bu həm onların mövqelərini möhkəmləndirir, eyni zamanda, müstəqil Azərbaycan Respublikasının mövqeyini gücləndirir, əhəmiyyətini artırır: "Biz çox şadıq ki, müxtəlif ölkələrdə yaşayan azərbaycanlılar o ölkələrin həyatında, iqtisadiyyatında çox mühüm rol oynayırlar və demək olar ki, artıq çox möhkəm mövqelərə malikdirlər".
Qeyd edək ki, İlham Əliyev dünya azərbaycanlılarına ənənəvi müraciətində onlara yaşadığı ölkələrin ictimai-siyasi həyatına sıx inteqrasiya etməyi tövsiyə edib.
Bu amilin vacibliyinə siyasilərin münasibəti necədir?
Siyasətçi Ramiz Tağıyev qəzetimizə açıqlamasında bildirdi ki, Azərbaycan yalnız onun hazırkı hüdudları daxilində yaşayanların vətəni deyil: "Mən vətən və birlik həsrətilə yaşayanların necə iztirab keçirdiklərini gözlərimlə görmüşəm. Sərhədlərin sökülməsi hərəkatına rəhbərlik edən bir şəxs kimi deyə bilərəm ki, həmin anlarda soydaşlarımız bir-birinə qovuşmaq üçün yanvar ayında özlərini Araz çayına atırdılar. Bəli, bizim Araz şəhidlərimiz də az olmayıb. Bu gün çox sevindirici haldır ki, bütün dünyada yaşayan 50 milyondan çox azərbaycanlının müstəqil dövləti var. Bu dövlət bizim hamımızın qürur yeri olmalıdır. Azərbaycan dövləti, onun Prezidenti soydaşlarımızla hər zaman maraqlanır. Dəfələrlə ölkə başçısı onları yaşadığı ölkələrin həyatında fəallıq nümayiş etdirməyə çağırıb. Artıq biz bu çağırışlardan doğan nəticələri görürük. Dünyanın bir sıra ölkələrinin parlamentində və digər vacib təsisatlarında azərbaycanlılara rast gəlinir. Bu sevindirici haldır. Biz istərdik ki, diasporumuzun fəallığı daha da artsın. Çünki bizim taleyüklü problemimizlə bağlı həqiqətləri dünya ictimaiyyətinə çatdırmaq üçün güclü diaspora ehtiyacımız var. Ermənilərin bu sahədə aktiv işləri nəzərə çarpır. Son vaxtlar görünür ki, onlara alternativ, bəzən isə onlardan daha artıq işlərə imza ata bilirik. Bu baxımdan da ölkə başçısının tövsiyəsinə mütləq mənada əməl olunmalıdır".
Məhəmmədəli QƏRİBLİ
