Azər Allahverənov: "Vizaya ödənilən rüsumun pulu ilə bilet alıb Bakıya gəlmək mümkün olacaq"
Azərbaycan gələn il İran vətəndaşları üçün viza rejimini əhəmiyyətli dərəcədə sadələşdirməyi planlaşdırır. Bu sözləri iqtisadiyyat naziri Şahin Mustafayev Bakıda Azərbaycan Respublikası ilə İran İslam Respublikası arasında iqtisadi, ticarət və humanitar sahələr üzrə Dövlət Komissiyasının 11-ci iclasında deyib.
Nazirin sözlərinə görə, qonşu dövlətlərin vətəndaşları üç iş günü ərzində elektron viza əldə edə biləcək: "2017-ci il yanvarın 10-dan başlayaraq İran vətəndaşları Azərbaycana daxil olmaq üçün vizaları ASAN Viza sistemi ilə ala bilər".
Bu rejimin tətbiqinin tam qüvvəyə minməsi nə kimi əhəmiyyət daşıyır?
Ekspert Azər Allahverənov qəzetimizə açıqlamasında bildirdi ki, bununla bağlı konkret qərar ortada yoxdur: "Bu yaxınlarda İranın səfiri dedi ki, tam vizasız gediş-gəlişin təmin olunması istiqamətində danışıqlar aparılır. Bir faktı qeyd edim ki, bu yaxınlarda əcnəbilərin ölkəyə gəlməsi üçün viza alınması prosesinin sadələşdirilməsi ilə bağlı qərar qəbul edilib.
İyunun 1-də Prezident İlham Əliyev elektron vizaların verilməsi prosedurunun sadələşdirilməsi və "ASAN Viza" sisteminin yaradılması haqqında fərman imzalayıb. Sənədə əsasən, Azərbaycan Respublikasına gələn əcnəbilər və vətəndaşlığı olmayan şəxslər üçün viza verilməsi prosedurunun sadələşdirilməsi məqsədilə müasir informasiya texnologiyalarının tətbiqi sayəsində operativliyi və şəffaflığı təmin edən elektron viza sistemi yaradılacaq. Bundan başqa ölkə vətəndaşları kimi, iranlılar da istifadə edəcək. Məsələnin başqa aspekti ondan ibarətdir ki, İran Azərbaycan vətəndaşlarına vizasız gedişə icazə verir. Bu səbəbdən də Azərbaycandan da bunu tələb edir. İstəyir ki, onlar da bura vizasız gələ bilsinlər. Azərbaycan isə Dağlıq Qarabağ problemi ilə bağlı buna tam hazır olmadığını bəyan edir. Yəqin ki, yeni danışıqların məzmunu bu istiqamətdədir. Hələlik dəqiq məlumat yoxdur. Ancaq, istənilən halda, bu amil iqtisadi faydaya səbəb olacaq, miqrasiya proseslərini gücləndirəcək. Məsələn, vizaya ödənilən rüsumun pulu ilə bilet alıb Bakıya gəlmək mümkün olacaq".
Məhəmmədəli QƏRİBLİ
