Aydın Mirzəzadə: "Əminəm ki, dünyada yaşayan bütün soydaşlarımız ölkə başçısının çağırışına səs verəcək"
Prezident İlham Əliyev dünya azərbaycanlılarına ünvanladığı ənənəvi təbrik məktubunda onları sıx birləşməyə və düşmənə qarşı birgə səylərlə mübarizəyə səsləyib.
"Əziz həmvətənlər! Hörmətli soydaşlar! 31 Dekabr - Dünya Azərbaycanlılarının Həmrəylik Günü bütün soydaşlarımızın mənəvi birliyinin rəmzi kimi hər il geniş qeyd olunur. Bu sevimli bayram ərəfəsində sizi ürəkdən salamlayır, hamınıza xoşbəxtlik və əminamanlıq arzulayıram...
...İnanıram ki, bütün soydaşlarımızın əlbir fəaliyyəti, doğma Azərbaycan torpağına sarsılmaz sədaqəti gücümüzü daha da artıracaq, inkişafımıza əngəl törədən yeganə ağrılı problemi - Ermənistanın hərbi təcavüzünü tezliklə aradan qaldırmağa, ölkəmizin ərazi bütövlüyünü bərpa etməyə imkan yaradacaq. Bu ilin aprel ayında Ermənistanın hərbi təxribatı nəticəsində cəbhədə baş vermiş hadisələr zamanı Azərbaycan Silahlı Qüvvələri düşmənin məkrli niyyətlərinin qarşısını qətiyyətlə aldı və torpaqlarımızı istənilən an işğaldan azad etməyə hazır olduğunu sübut etdi.
Azərbaycanın haqlı mövqeyi getdikcə beynəlxalq ictimaiyyətin daha çox dəstəyini qazanır. Ölkəmizin mədəniyyətlərarası dialoqun təşviqinə və qlobal humanitar problemlərin həllinə verdiyi töhfələr, multikultural dəyərlərə hörməti və tolerantlıq ənənələri xalqımıza dünyada dərin rəğbət oyatmışdır.
Hazırda Azərbaycan Respublikası öz inkişafının çox məsuliyyətli bir dövrünə qədəm qoymuşdur. Biz vətənimizin çiçəklənməsi, qüdrətinin artırılması və suverenliyinin möhkəmləndirilməsi məqsədilə qarşımıza böyük vəzifələr qoymuşuq. Həmin vəzifələrin həlli üçün bütün həmvətənlərimiz, o cümlədən xaricdə yaşayan soydaşlarımız sıx birləşməli, harada yaşamalarından asılı olmayaraq, milli maraqlarımızı qətiyyətlə qorumalı, anti-Azərbaycan dairələrin təxribatçı əməllərinə qarşı prinsipial mübarizə aparmalıdırlar.
Sizi Dünya Azərbaycanlılarının Həmrəylik Günü münasibətilə səmimi qəlbdən təbrik edir, hər birinizə səadət, firavanlıq və bütün işlərinizdə uğurlar diləyirəm".
Ölkə başçısının soydaşlarımızı birləşərək birgə mübarizəyə səsləməsi hansı mənanı ifadə edir və onların üzərinə nə kimi məsuliyyət qoyur?
Millət vəklili Aydın Mirzəzadə qəzetimizə açıqlamasında bildirdi ki, ölkə başçısının soydaşlarımıza ünvanladığı həmrəylik təbrikində əks olunan məqamlar çox əhəmiyyətlidir:
"Bilirsiniz ki, Azərbaycan həm də dünyanın müxtəlif ölkələrində yaşayan 50 milyondan artıq soydaşımızın tarixi vətənidir. Ölkə başçısı hər zaman onlara böyük qayğı və diqqətlə yanaşıb. Ermənistandan başqa, dünyanın bütün ölkələri Azərbaycanın ərazi bütövlüyünü dəstəkləyir. Cənab İlham Əliyev soydaşlarımızı haqq olan bir işdə dövlətimizə dəstək verməyə çağırır. İnsafən demək lazımdır ki, soydaşlarımız bu işdə daim fəal olublar. Ümidvaram ki, bu çağırış onları Azərbaycan həqiqətlərini yaşadıqları ölkələrin ictimaiyyətinə çatdırmaq üçün daha da ruhlandıracaq. Bizim diaspor fəallarımızdan digər istədiyimiz isə erməni yalanlarına qarşı çıxmaq, bacardıqca onları ifşa etməkdir. Əminəm ki, dünyada yaşayan bütün soydaşlarımız ölkə başçısının çağırışına səs verəcək".
Məhəmmədəli QƏRİBLİ
