"Prosesin birdəfəlik deyil, davamlı olması isə bir daha sübut edir ki, dövlət mediaya..."
Dünya Azərbaycanlılarının Həmrəylik Günü və Yeni il münasibətilə Azərbaycan Prezidenti yanında Kütləvi İnformasiya Vasitələrinin İnkişafına Dövlət Dəstəyi Fondu (KİVDF) tərəfindən elan olunan fərdi jurnalist yazısı müsabiqəsinin qaliblərinin mükafatlandırma mərasimində Azərbaycan Prezidentinin ictimai-siyasi məsələlər üzrə köməkçisi Əli Həsənov bildirib ki, media Azərbaycan cəmiyyətinin ən nüfuzlu institutlarından biri səviyyəsindədir:
"Media cəmiyyətin formalaşmasında, inkişafında mühüm rol oynayır. Ona görə də ulu öndər Heydər Əliyev medianı Azərbaycan cəmiyyətinin əsas ictimai institutlarından biri kimi görürdü. Məhz buna görə də ümummilli lider media üzərindən bütün ictimai tənzimləmə mexanizmlərini aradan qaldırdı və jurnalistlər Mətbuat Şurasını yaratdılar. Bu gün biz Azərbaycan dövləti olaraq medianın rolunu və yerini onların özlərinin gördüyü kimi görürük. Prezident İlham Əliyev Azərbaycanı azad mediasız təsəvvür etmədiyini bildirib".
Ə.Həsənov qeyd edib ki, KİVDF vasitəsilə medianın inkişafına 28 milyon manata yaxın vəsait ayrılıb: "Təxminən bir o qədər də vəsait medianın problemlərinin həllinə yönəlib. Media qurumlarının borcları silinib, media dövlətin bütün qayğı mexanizmlərindən istifadə edir. Dövlət tərəfindən jurnalistlər üçün evlər tikilib və tikilməkdə davam edir. Dövlət bütün bunları ona görə edir ki, siz Azərbaycan cəmiyyətindəki ictimai rolunuzu bundan sonra bacarıqla həyata keçirə biləsiniz. Dövlət jurnalistlərin qayğısına qalır. Dağlıq Qarabağ münaqişəsi ilə bağlı həqiqətlərin dünya ictimaiyyətinə çatdırılmasında medianın mühüm rolu var. Bu gün biz böyük erməni lobbisi, islamafob dairələrlə üz-üzəyik. Missioner təşkilatlar var ki, Azərbaycanın inkişafını gözləri götürmür. Bütün bunlarla mübarizə aparmaq üçün biz medianın köməyini umuruq, sizdən dəstək gözləyirik".
KİVDF xətti ilə qəzetlərə son 7 il ərzində ayrılan 28 milyon manat vəsait KİV-lərin inkişafında hansı rolu oynayıb?
Media eksperti Yadigar Məmmədli qəzetimizə açıqlamasında bildirdi ki, doğrudan da medianın üzərində dövlətin bu qayğısı əvəzolunmazdır: "Qəzetlərin yardımdan əvvəlki dönəmini yada salın. Mətbəələrə borclar yaranırdı, elə olurdu ki, jurnalistlər aylarla maaşını ala bilmirdi. Belə hallar bəzən medianı məcbur edirdi ki, maliyyə qaynağı axtarışına çıxsın. Əksər hallarda isə əldə olunan vəsait şərtlə verilirdi və media hansısa qrupun təsir dairəsinə düşürdü. Dövlətin bu addımı xüsusilə alqışlanmalıdır ki, KİV-ləri həmin acınacaqlı durumdan qurtardı. Prosesin birdəfəlik deyil, davamlı olması isə bir da sübut edir ki, dövlət mediaya verdiyi dəstəyi daimi etmək niyyətindədir. Biz göstərilən qayğı nəticəsində redaksiyaların maddi-texniki bazasının yeniləndiyini, jurnalistlərin yaşam tərzində müəyyən irəliləyişlərin olduğunu hiss edirik. Bütün bu faktorlar da sağlam jurnalistikanın formalaşmasına əsas verir".
Məhəmmədəli QƏRİBLİ
