"Milli maraqlarımızın müdafiəsi, Azərbaycana düşmən kəsilən qüvvələrin ifşa olunması istiqamətində mətbuatın fəaliyyəti davam edəcək"
Dünya Azərbaycanlılarının Həmrəylik Günü və Yeni il münasibətilə Azərbaycan Prezidenti yanında Kütləvi İnformasiya Vasitələrinin İnkişafına Dövlət Dəstəyi Fondu (KİVDF) tərəfindən elan olunan fərdi jurnalist yazısı müsabiqəsi qaliblərinin mükafatlandırılması mərasimində çıxış edən Prezidentin ictimai-siyasi məsələlər üzrə köməkçisi Əli Həsənov bir sıra məqamlara toxunub.
Onun sözlərinə görə, media Azərbaycan cəmiyyətinin nüfuzlu institutlarından biri səviyyəsindədir: "Media cəmiyyətin formalaşmasında, inkişafında mühüm rol oynayır. Ona görə də ulu öndər Heydər Əliyev medianı Azərbaycan cəmiyyətinin əsas ictimai institutlarından biri kimi görürdü. Məhz buna görə də ümummilli lider media üzərindən bütün ictimai tənzimləmə mexanizmlərini aradan qaldırdı və jurnalistlər Mətbuat Şurasını yaratdılar. Bu gün biz Azərbaycan dövləti olaraq medianın rolunu və yerini onların özlərinin gördüyü kimi görürük. Prezident İlham Əliyev Azərbaycanı azad mediasız təsəvvür etmədiyini bildirib".
Bununla yanaşı, Ə.Həsənov medianın Azərbaycanın maraqlarının qorunmasında oynadığı rolu qeyd edib: "Dağlıq Qarabağ münaqişəsi ilə bağlı həqiqətlərin dünya ictimaiyyətinə çatdırılmasında medianın mühüm rolu var. Bu gün biz böyük erməni lobbisi, islamafob dairələrlə üz-üzəyik. Missioner təşkilatlar var ki, Azərbaycanın inkişafını gözləri götürmür. Bütün bunlarla mübarizə aparmaq üçün biz medianın köməyini umuruq, sizdən dəstək gözləyirik".
Ümumilikdə, bu yöndə mübarizədə media nə kimi işlər görə bilər?
Məsələyə münasibət bildirən "Xalq Cəbhəsi" qəzetinin baş redaktoru Elçin Mirzəbəyli Azərbaycan dövlətinin ölkə mediasına verdiyi bu dəyərə görə təşəkkürünü ifadə etdi: "Şübhəsiz ki, bütün bunlar üzərimizə daha böyük məsuliyyət qoyur. Azərbaycan mediası öz imkanları, dövlətin verdiyi imkanlar çərçivəsində milli maraqlarımızın müdafiəsi istiqamətində kifayət qədər addımlar atıb. Bu proses daha da genişlənir. Şübhəsiz ki, bu işdə Azərbaycan dövlətinin bizə verdiyi dəstəyi xüsusi qeyd etmək lazımdır. Təbii ki, daha geniş şəkildə fəaliyyət aparmaq imkanlarımız var. Ümid edirəm ki, bundan sonra da milli maraqlarımızın müdafiəsi, Azərbaycana düşmən kəsilən qüvvələrin ifşa olunması istiqamətində mətbuatın fəaliyyəti davam edəcək. Çünki Azərbaycanın regionda və dünyada get-gedə möhkəmlənən mövqeyi bunu diqtə edir. Hesab edirəm ki, ölkə mətbuatı belə hallara qarşı bundan sonra daha adekvat olmalıdır".
Vidadi ORDAHALLI
