Azərbaycan mətbuatı Cənubi Qafqazda, eləcə də beynəlxalq aləmdə öz sözünü deyən mətbuatdır. Dövlətçiliyə, azərbaycançılıq ideologiyasına sadiq bir təsisatdır. Xalqımızın maariflənməsində, cəmiyyətimizin inkişafında, dövlətçiliyimizin qorunmasında mühüm rola malik olan mətbuatımız dövlət siyasətini tam dəstəkləyir.
Son 13 ildə mətbuatımızın keçdiyi yolu qiymətləndirən "İki sahil" qəzetinin baş redaktoru Vüqar Rəhimzadə bizimlə söhbətində bildirdi ki, İlham Əliyev Azərbaycan Respublikasının Prezidenti seçildikdən sonra mətbuata diqqət və qayğı daha da artırılıb: "Son illər Azərbaycan mediası üçün görülən işlər göz qabağındadır və bunu hər bir media təmsilçisi görür. 2003-cü ildən 2016-cı ilə qədər mətbuatımıza göstərilən dövlət qayğısı genişdir. Bilirsiniz ki, bunun bütün dünyada analoqu yoxdur. Bu sahənin inkişafı üçün imzalanan sənədlər, sərəncamlar müstəqil Azərbaycan mətbuatının inkişafında xüsusi rola malikdir. 2003-cü ildən bəri görülən işlərin sırasında milli mətbuatımızın yubileylərinin qeyd edilməsi, "Əməkdar jurnalist" fəxri adının bərpa edilməsi, media təmsilçilərinin müxtəlif mükafatlarla təltif olunması və s. var. Eyni zamanda da Azərbaycan Respublikasının Prezidenti yanında Kütləvi İnformasiya Vasitələrinin İnkişafına Dövlət Dəstəyi Fondunun yaradılması təqdirəlayiq hal oldu. Onu da vurğulayım ki, Azərbaycan Respublikasının Prezidenti yanında Kütləvi İnformasiya Vasitələrinin İnkişafına Dövlət Dəstəyi Fondunun həyata keçirdiyi çoxsaylı layihələr mətbuatın inkişafına təkan olub. Fondun fəaliyyət göstərdiyi müddət ərzində həm Azərbaycan mediasının iqtisadi vəziyyətinin yaxşılaşması, sosial layihələrin reallaşdırılması, jurnalist-yazı müsabiqələrinin keçirilməsi, redaksiyaların maddi-texniki bazasının möhkəmləndirilməsi sahəsində böyük işlər görülüb. Redaksiyaların maddi-texniki bazasının güclənməsi jurnalistlərin peşəkarlıq səviyyəsinin artmasına da yaxşı mənada təsir edib.
Siz hamınız yaxşı xatırlayırsınız ki, 2010-cu ildə Azərbaycan və dünya mətbuat tarixində heç olmayan bir hadisə baş verdi. Bu o hadisə idi ki, jurnalistlərin mənzil-məişət şəraitinin yaxşılaşdırılması üçün cənab Prezident tərəfindən addım atıldı və jurnalistlər üçün yaşayış binasının inşa edilməsi haqqında Sərəncam imzalandı. Bu doğrudan da önəmli bir hadisədir. 156 mənzil Azərbaycan jurnalistlərinin ixtiyarına verildi. Bu hadisənin dünyanın heç bir yerində təkrarı yoxdur".
V.Rəhimzadə qeyd etdi ki, 2010-cu ildə inşası barədə qərar verilən jurnalistlər binası 2013-cü ildə istifadəyə verildi. Jurnalistlərin mənzil-məişət şəraitinin yaxşılaşdırılması üçün inşa edilən ikinci binanın da media mənsublarının ixtiyarına veriləcəyini deyən V.Rəhimzadə hesab edir ki, bu, ölkə başçısının mətbuatımıza qayğısının nəticəsidir. "2015-ci ildə milli mətbuatımızın yaranmasının 140 illik yubileyinin keçirilməsi, bu münasibətlə böyük təltiflərin olması təqdirəlayiqdir. Mətbuatımızın 140 illiyində 200-dən artıq ölkənin aparıcı media nümayəndəsi dövlətin ali mükafatları ilə təltif olundu. Mətbuata birdəfəlik maliyyə yardımları ayrıldı. Ümumiyyətlə, dövlət, dövlət başçısı tərəfindən mətbuata kifayət qədər dəstək var. Bu sahədə görülən işlərin uğurları göz qabağındadır. Hesab edirəm ki, Azərbaycanın müstəqil mətbuat modeli dünyanın bir sıra ölkələrində örnək göstərilən modeldir. Bizim qarşımızda duran ən başlıca vəzifə, məqsəd, Azərbaycan vətəndaşı olaraq, vətəndaş mövqeyi nümayiş etdirib dövlətimizin, dövlət başçısı cənab Prezidentin həyata keçirdiyi işləri yalnız ölkə ictimaiyyətinə deyil, dünya ictimaiyyətinə çatdırılmasına öz töhfələrimizi verməkdir" - deyə V.Rəhimzadə bildirdi.
"Şərq" qəzetinin baş redaktoru Akif Aşırlı da bizimlə söhbətində son 13 ildə Azərbaycan mətbuatının həyatında baş verən müsbət dəyişikliklərdən, dövlətin mətbuata bəslədiyi sonsuz qayğıdan danışdı.
A.Aşırlı qeyd etdi ki, milli mətbuatımız dövlət qayğısı sayəsində ayaqdadır: "2003-cü ildən bəri mediamızda bir sıra yeniliklər formalaşmağa başlayıb. Klassik media təchizatları ilə yanaşı, müasir media sahələri də meydana çıxdı. Məlumdur ki, klassik media ənənələrini yaşatmaq üçün görülən tədbirlər, jurnalistlərin sosial problemlərini həll etmək üçün sosial proqramların həyata keçirilməsi son 13 ilə təsadüf edir. KİVDF-nin yaradılması və fəaliyyəti mətbuata dövlət qayğısının təzahürüdür. Azərbaycan dövləti olmasaydı, çap mətbuatının yaşaması sual altında idi. Ona görə də KİVDF-nin yaranması, "Azərbaycan Respublikasında kütləvi informasiya vasitələrinin inkişafına dövlət dəstəyi Konsepsiyası"nın qəbul edilməsi bu yöndə atılan ən mühüm addımlardan biridir".
A.Aşırlı artıq Azərbaycan mediasının dünyaya çıxışının və Azərbaycan həqiqətlərinin dünyaya yayılmasının məhz bu illərə təsadüf etdiyini qeyd etdi. O bildirdi ki, mediamızın inkişafı onun dünyaya çıxışına təkan oldu və mətbuatımız Azərbaycanı istəməyən qüvvələrlə mübarizədə aktivdir: "Biz son 13 ildə dünyaya güclü bir media qüvvəsi kimi çıxa bildik. Hesab edirəm ki, 2003-cü ildən bu yana mətbuat sahəsində xeyli müsbət işlər görülüb. Təbii, hələ görüləsi işlərimiz də var. İnanıram ki, Azərbaycanın müstəqilliyi möhkəmləndikcə, gücləndikcə, dövlətimiz inkişaf etdikcə, bu problemlər də aradan qalxacaq".
İradə SARIYEVA
