"Qloballaşan dünyada Azərbaycan tərəfi də virtual mübarizəyə hazır olmalıdır"
"Bu gün Azərbaycanın virtual məkanda müdafiəsi üçün kiber əsgərlər yetişdirmək lazımdır". Bu sözləri Azərbaycan Milli Elmlər Akademiyasının İnformasiya Texnologiyaları İnstitutunun direktoru Rasim Əliquliyev bildirib.
O deyib ki, 25 il ərzində ölkənin hərbi, iqtisadi, siyasi suverenliyi sırasında informasiya suverenliyi də bərqərar olunub. İnternet məkanında Azərbaycanla bağlı çox böyük işlərin görüldüyünü deyən direktor vurğulayıb ki, ölkəmizi tək real məkanda, sərhədlər çərçivəsində yox, virtual məkanda da qorumalıyıq.
Onun sözlərinə görə, informasiya müharibəsi barədə şagirdlərə, tələbələrə zəruri biliklər verilməli, bu günün əsgəri həm də kiber əsgər olmalıdır: "Azərbaycan ordusu yüksək texnologiyalarla təmin olunur. Bu gün şagirdlərə "Kalaşnikov" avtomatını öyrətməklə yanaşı, informasiya mübarizəsi texnologiyalarını öyrətməliyik. Xüsusilə "Vikipediya" ilə bağlı müəyyən narahatlıqlar var. Çünki "Vikipediya" sahəsində o qədər də yaxşı vəziyyətdə deyilik. Buna görə ayılmalı, virtual Azərbaycanı inkişaf etdirməliyik. Ölkəmizin həm real, həm də virtual məkanda müdafiəsini təmin etmək, şagird və tələbələrin internet resurslarında, sosial şəbəkələrdə, "Vikipediya" və digər mənbələrdə səmərəli fəaliyyət göstərməsi üçün zəruri biliklər tədris olunmalıdır".
Hərbi ekspert Üzeyir Cəfərov "Bakı-Xəbər"ə açıqlamasında qeyd etdi ki, XXI əsri əbəs yerə texnologiya dövrü adlandırmırlar: "Bəllidir ki, inkişaf etmiş ölkələr belə virtual mübarizədə ziyanla üzləşir. Bir ölkə digər ölkənin ən vacib məlumatlarına müdaxilə edir, onları əldə etməyə çalışır. Bu məlumatların içərisində dövlət və ya hərbi sirlər də var. Müharibə vəziyyətində olan Azərbaycanda kiber qrupların yaradılması vacibdir. Belə olarsa, həm Müdafiə Nazirliyinin məlumatları etibarlı şəkildə qorunar, həm də bir sıra məsələlərdə, lazım gələrsə, Azərbaycana düşmən mövqeyində olan ölkələrin müvafiq qurumlarına müəyyən problemlər yaratmaq olar. Bundan çəkinmək lazım deyil. Bir sıra ölkələr kiber əsgərlərin yaradılmasına müəyyən məbləğdə vəsait sərf edir. Məlum məsələ ilə bağlı Azərbaycan qonşu ölkələrdən geri qalmamalıdır. Qloballaşan dünyada Azərbaycan tərəfi də virtual mübarizəyə hazır olmalıdır".
Günel CƏLİLOVA
