Sosial şəbəkələrdə Bakı Dövlət Universiteti tələbəsinin Azərbaycan bayrağını başına salaraq rəqs etməsini əks etdirən video yayılıb. BDU-nun İctimaiyyətlə əlaqələr və informasiya şöbəsindən mətbuata verilən məlumata görə, həmin tələbə - BDU-nun Mexanika-riyaziyyat fakültəsinin Mexanika ixtisası üzrə I kurs tələbəsi Məhəmmədov Pərviz Əlipənah oğlu ali məktəbdən xaric edilib.
“Lakin Pərviz Məhəmmədov 23.11.2020-ci il tarixində tədris prosesi zamanı yenidən universitetin daxili nizam-intizam qaydalarını kobud şəkildə pozub, həmçinin, şəhidlərimizin qanı ilə boyanmış, Ali Baş Komandanımızın rəhbərliyilə şanlı ordumuzun işğaldan azad edilmiş əzəli torpaqlarımızda qürurla dalğalandırdığı Azərbaycan Respublikasının Dövlət bayrağına qarşı təhqiredici hərəkətlər edib” - deyə BDU-nun aidiyyəti şöbəsindən bildirilib.
Onu da vurğulayaq ki, Pərviz Məhəmmədovun BDU-dan xaric edilməsi ölkəmizin tanınmış pedaqoqları, alimləri tərəfindən müsbət qarşılanmayıb. Alimlər qeyd edirlər ki, P.Məhəmmədovu başqa cür də tənbeh etmək olardı, onu ali məktəbdən çıxarıb gələcəyini məhv etmək doğru deyil.
Bundan başqa, Pərviz bayrağı başına salıb rəqs edib, biz Pərvizə buna görə haqq qazandırmırıq, o belə davranış sərgiləməməli idi, lakin bu heç də onun bayrağa hörmətsizliyinin ifadəsi deyil. Azərbaycan bayrağını daha dəhşətli şəkildə təhqir edənlər var. Şou müğənniləri Azərbaycan bayrağından şalvar-köynək, kostyum, ətək, şortik, açıq-saçıq geyimlər tikdirir, bayrağımızı çılpaq bədənlərinə bürüyürlər. Bayrağı bundan da dəhşətli şəkildə təhqir etmək olarmı?! Amma bayrağı paltar kimi əyninə geyinənlər, ondan şortik, şalvar tikib istifadə edənlər bu cinayətlərə görə cavab vermirlər, heç kəs onlardan soruşmur ki, hansı əsasla siz Azərbaycan bayrağından bu şəkildə istifadə edirsiniz?
“Bayrağı bütünlüklə bədənə geyinmək rəsmən qadağan olunmalıdır”
Filologiya üzrə fəlsəfə doktoru, dosent, tanınmış alim Vüsalə Ağabəyli baki-xeber.com-a bildirdi ki, tələbəyə haqq qazandırmır, amma ondan da dəhşətli şəkildə bayrağımıza ləkə gətirmək istəyən, onu təhqir edən hərəkətlərə yol verən, lakin buna görə cəzasız qalanlar var. “Mən, əslində, tələbəyə haqq qazandırmıram, lakin nəzərə alaq ki, I kurs tələbəsidir, yeniyetməlik eqosu var və etdiyi hərəkətin mahiyyətini anlamayıb. Əgər ailə vətənpərvər olmasaydı, o evdə heç Dövlət bayrağımız olmazdı. Əsas məsələ isə odur ki, Dövlət bayrağını stolunun üstünə, otağına qoyub kifayət qədər ciddi qanun pozuntusu edən vətəndaşlar, başqalarının haqqına girənlər, rüşvətxorluq, korrupsiya ilə məşğul olanlar var. Bəs bunlar Dövlət bayrağına hörmətsizlik deyil? Nəinki bayrağa, bütün millətə və milli atributlarımıza hörmətsizlikdir.
Digər məsələ isə odur ki, düzdür, mən tələbəni müğənni tayfası ilə müqayisə etmək istəmirəm, müğənnilər Dövlət bayrağını şortik, şalvar, ətək və s. edib geyinəndə niyə belə kütləvi reaksiya verən olmur? Ümumiyyətlə, Dövlət bayrağı ilə düzgün davranış qaydaları açıqlanmalı və kütləvi şəkildə təbliğ olunmalıdır. Bayrağı bütünlüklə bədənə geyinmək qadağan olunmalıdır.
Pərvizə isə, düşünürəm ki, bu ciddi dərs oldu, səhvini anlayar. Onu təhsildən kənarlaşdırmağı doğru hesab etmirəm. Cəmiyyətdən təcrid etmək əvəzinə, onu cəmiyyətə qazandırmalıyıq. Pərviz hələ körpə ağacdır, körpə ağac əyiləndə dəstək verib düzləşdirmək olur, lakin kök salmış “içi çürük kötüklər” isə böyük problemdir. Hədəfimiz onlar olmalıdır, gənc nəsli isə topluma qazandıra bilərik” - deyə V.Ağabəyli bildirdi.
İradə SARIYEVA
