Birləşmiş Ərəb Əmirliklərinin (BƏƏ) Baş naziri və Dubay əmiri Şeyx Məhəmməd ibn Rəşid əl-Maktumun həyat yoldaşı Haya bint əl-Hüseynin külli miqdarda pul götürərək ölkədən qaçması olyı ilə bağlı yeni xəbərlər yayılıb.
Baki-xeber.com xəbər verir ki, Qərb mediası hazırda Böyük Britaniyada gizlənən Hayanın qorxu içində olduğunu iddia edir. O qaçırılaraq yenidən Dubaya aparıla biləcəyindən ehtiyatlanır.
BBC yazır ki, Haya bir müddət əvvəl sığınacaq almaq üçün getdiyi Almaniyadan sonra Londona sığınıb və burada gizlənir.
Xəbərə görə, İordaniya əsilli və Britaniyada təhsil almış Haya, şəhər mərkəzindəki Kensington Palace Gardens bölgəsində 107 milyon dollar dəyərində bir evdə yaşayır.
Iddia edilir ki, Həya, şeyxin ölkədən qaçmaq istəyərkən saxlanan qızı Lətifənin yaşadıqlarının pərdəarxasını öyrəndikdən sonra, öz təhlükəsizliyi ilə bağlı da narahat olmağa başlayıb və bundan sonra qaçmaq qərarı verib.
“The Guardian” yazır ki, çox ehtimal cütlük ayrılıb və Haya Dubaydan ayrıldıqdan sonra Ali Məhkəmədə iddia qaldırılıb.
Londondakı BƏƏ səfirliyi məsələnin “iki nəfər arasında yaşanan şəxsi bir məsələ” olduğunu bildirərək açıqlam verməkdən imtina edib.
Hadisənin Britaniya ilə BƏƏ arasında diplomatik qalmaqala səbəb ola biləcəyi ehtimalı da var. Dubay əmiri Hayanı geri istəsə, bu BƏƏ ilə yaxın əlaqələri olan İngiltərə üçün problem ola bilər.
İngiltərədə yarış atları ferması olan Şeyx Məhəmmədin Kraliça II Elizabethlə yaxın əlaqələri var. Ancaq buna baxmayaraq, Haya çox ehtimal ki, Londondan ayrılmaq istəməyəcək.
Olayla bağlı İordaniya-BƏƏ əlaqələrində də problem yarana bilər. Haya İordaniya Kralı Abdullahın ögey bacısıdır. Digər tərəfdən, BƏƏ-də təxminən 250 min iordaniyalı işçi var. Bu işçilər BƏƏ-də qazandıqları pulları ölkələrinə göndərirlər.
Xatırladaq ki, 2004-cü ildə Dubay əmiri ilə ailə quran Haya bint əl-Hüseyn şeyxin sayca altıncı arvadı olub. 69 yaşlı şeyxin 6 həyat yoldaşından 23 uşağı var.
