İyunun 29-da Yaponiyanın Osaka şəhərində "Böyük iyirmilik" (G20) sammiti çərçivəsində bir araya gələn ABŞ və Türkiyə prezidentləri əsasən S-400 raket kompleksi və F-35 döyüş təyyarələri ilə bağlı məsələləri müzakirə ediblər.
Baki-xeber.com xarici mediaya istinadən xəbər verir ki, hər iki liderin görüşdən sonra keçirdiyi mətbuat konfransında da əsas gündəm sözügedən iki mövzu ilə bağlı olub.
Tramp Türkiyəyə qarşı ədalətli davranılmadığını deyib, Ərdoğan isə Trampın sanksiyalar məsələsinə aydınlıq gətirdiyini və belə bir şeyin olmayacağını söylədiyini bildirib.
Türkiyə S-400 aldıqdan sonra sanksiyalar tətbiq edilib-edilməyəcəyi sualını cavablandıran
Tramp isə, S-400 məsələsinin çox qəliz olduğunu deyib və bu vəziyyətə görə də keçmiş ABŞ prezidenti Barak Obamanı günahlandırıb. Onun sözlərinə görə, Türkiyə Obamanın prezidentliyi dövründə dəfələrlə tələb etməsinə baxmayaraq, “Patriot”ların satışına razılıq verilməyib.
“Ədalətli olmadılar. “Patriot” almaq istədilər, ancaq Obama yox dedi, dəfələrlə yox deyildi. Türkiyənin müdafiəsi üçün buna ehtiyacı vardı. Sonra getdilər Rusiyadan S-400 aldılar. Çünki məndən əvvəlki rəhbərlik “Patriot” almalarına icazə vermədi.
... Çox pul verdilər və aldılar. Bizim ölkəmizdən isə gedib dedilər ki, “Bunu istifadə etmənizi istəmirik, bizə yaxşılıq edin, biz də sizə “Patriot” sataq”. Ancaq çox gec idi, sistem alınmışdı.
Bu arada, 116 ədəd də F-35 aldılar və yenə də almaq istəyirlər. Indi pulunu ödədikləri təyyarələrin təslim edilməsini istəyirlər.
İndi deyəcəklər “Tramp Türkiyəni sevir”. Xeyr, mən ölkəmi sevirəm. Amma bunu demək məcburiyyətindəyəm.Ərdoğana haqsızlıq edildi. Ona ədalətsiz davranıldığını düşünürəm. Çünki “Patriot” ala bilməzsiniz dedik, onlar başqa sistem aldıqdan sonra isə fikrimizi dəyişdirdik.
Bu qəliz bir vəziyyətdir. Üzərində işləyirik” - Tramp deyib.
Trump, S400 məsələsində vəziyyətin qarmaqarışıq olduğunu deyərək, fərqli bir həll yolu axtardıqlarını bildirib.
Bundan əvvəl ABŞ dəfələrlə bəyan edib ki, Ankara Rusiyadan S-400 raket kompleksləri alsa F-35 təyyarələri Türkiyəyə verilməyəcək. Üstəlik Vaşinqton Ankaranı sanksiya tətbiq etməklə də təhdid edib. Türkiyə isə ABŞ-ın təhdidlərinə baxmayaraq S-400-ləri almaq niyyətində olduğunu bildirib.
