Tiflisdə iyunun 20-də başlayan etiraz aksiyası davam edir. Rusiya Dövlət Dumasının deputatı Sergey Qavrilovun Gürcüstana gəlişinə etiraz olaraq iyunun 20-də başlayan etiraz aksiyaları iyunun 21-i axşam saatlarında hüquq-mühafizə orqanları əməkdaşları ilə qarşıdurmaya çevrilib. Etirazçıların əsas tələbi isə parlamentin spikeri İrakli Kobaxidzenin istefası olub. 80-i hüquq-mühafizə orqanı əməkdaşı olmaqla 240 nəfər xəsarət aldığı, 300-dən çox şəxsin həbsilə nəticələnən qarşıdurmalardan sonra İrakli Kobaxidze parlamentin spikeri postundan istefa verib.
Baki-xeber.com xarici mediaya istinadən xəbər verir ki, bundan sonra etirazçılar daxili işlər naziri Georgi Qaxariyanın istefasını tələb etməyə başlayıblar. Etiraz aksiyaları günlərdir davam edir. Bütün bunlara baxmayaraq, hökumət Qaxariyanı istefaya göndərmək niyyətində deyil.
Gürcüstanın baş naziri Mamuka Baxtadze 20-21 iyun tarixlərində dövlət çevrilişinin qarşısını aldığı üçün ölkənin Daxili İşlər nazirini tərifləyib. Sputnik Gürcüstan yazır ki, Baxtadze Gürcüstanda güc yolu ilə hakimiyyətin dəyişdiyi 1991 və 2003-cü illərdə baş verən hadisələri xatırladıb.
"Hər iki halda məlum oldu ki, dövlət institutları özü, xüsusilə də dövlət institutlarına hücumun qarşısını almalı olan Daxili İşlər Nazirliyi yüksək səviyyədə olmayıb. İndi isə Daxili İşlər Nazirliyi bizə belə bir ağır ssenari və təcrübənin təkrarlanmasından yayınmağa kömək etdi. Bundan irəli gələrək daxili işlər naziri və bütün Daxili İşlər Nazirliyi mənim və cəmiyyətin adından təşəkkürə layiqdir", - deyə baş nazir qeyd edib.
Baş nazir qarşıdurma xəsarət alanlardan bir qisminin müalicə üçün xaricə göndərildiyini deyib: “Lazım olsa digərlərinin müalicəsi üçün də Gürcüstana ən yaxşı həkimləri gətirəcəyik”.
Bundan əvvəl isə baş nazir bəyan edib ki, baş verən qarşıdurmaya görə, məsuliyyət keçmiş prezident (Mixeil Saakaşvili) və onun komandasının üzərinə düşür.
Qaxariya özü də istefa verməyəcəyinə eyham vurub. O deyib ki, iyunun 20-də polis qanun çərçivəsində hərəkət edib: “Bütün məsuliyyəti öz üzərimə götürürəm. Polis qanun çərçivəsində hərəkət edib... Mən burdayam, hər bir polis əməkdaşını müdafiə edəcəyəm”.
Bundan başqa, Qaxariya, Gücüstanda etiraz aksiyalarına səbəbkarı olan Rusiya Dumasının deputatı Sergey Qavrilov bir daha Gürcüstana gəlmək istəsə, onu ölkəyə buraxmayacaqlarını deyib.
“Novaya qazeta”ya müsahibəsində Qavrilov bildirmişdi ki, Gürcüstana bir daha getmək istəyir, sadəcə istilərin səngidiyi vaxtda – payızda və ailəsi ilə getməyi planlaşdırır. “İstəyirəm ki, uşaqlarım bu ölkəni tanısınlar, çünki bizim Gücüstan kimi ikinci başqa ölkəmiz yoxdur”, - gəlişi ilə Gücüstanda etiraz aksiyalarına səbəb olan deputat deyib.
