Gürcüstan müxalifəti ilə təhlükəsizlik qüvvələri arasında iyunun 20-də parlament qarşısında toqquşmalar baş verib.
Baki-xeber.com xəbər verir ki, Rusiyadan gəlmiş deputatın Gürcüstan parlamentinin kürsüsündə rus dilində çıxış etməsi ortalığı qarışdırıb.
Tiflisdə açılışı olan 26-cı Pravoslav Parlamentlərarası Baş Assambleyasının ikinci gününə Rusiya Kommunist Partiyasının üzvü və Rusiya Dövlət Dumasının deputatı Sergey Qavrilov başçılıq edib. Rus deputat S.Qavrilovun parlament sədrinin kreslosunda oturması müxaliflərin sərt etirazına səbəb olub. Parlamentdəki müxalif deputatlar tədbiri tərk edib. Parlamentdə yaşanan uzun gərginlikdən sonra tədbir təxirə salınıb.
Ancaq bu dəfə xalq küçələrə çıxıb və Rusiyadan gələn heyətin dərhal ölkədən çıxarılmasını tələb edib. Onlar parlament sədri İrakli Kobaxidze, daxili işlər naziri və başqa rəsmi şəxslərin istefasını tələb ediblər.
Parlament binasına daxil olmaq istəyən etirazçılarla polis arasında qarşıdurma yaranıb. Polis etirazçılara qarşı qaz və plastik güllələrdən istifadə edib, onların parlament binasına girişinin qarşısını alıb.
Gürcüstanın Səhiyyə nazirinin müavini Zaza Boxua bildirib ki, parlamentin binası önündə baş verən qarşıdurma zamanı yaralıların sayı 240-a çatıb. Onun sözlərinə görə, yaralılardan 80-i polis əməkdaşıdır. O qeyd edib ki, hazırda 102 pasiyent Tiflis xəstəxanalarındadır.
Gürcüstanın Daxili İşlər Nazirliyi isə Tiflisdə parlament qarşısında etiraz aksiyalarını kütləvi şəkildə dövlət çevrilişi cəhdi kimi dəyərləndirib.
Gürcüstan Baş naziri Mamuka Baxtadze bəyan edib ki, Tiflisin mərkəzində kütləvi qarşıdurmanın təşkilatçıları, bu insidentlə bağlı buraxılan səhvlərə görə həm müxalifət, həm də hakim komandanın üzvləri məsuliyyətə cəlb olunacaq.
Bu arada, Gürcüstan Prezidenti Salome Zurabişvili Belarus səfərini yarımçıq qoyaraq təcili Tiflisə qayıdıb. O, Minskə bir gün öncə gedib. Onun Belarus prezidenti Aleksandr Lukaşenko və Baş nazir Sergey Rumasla görüşü nəzərdə tutulurdu. Gürcü lideri, həmçinin, II Avropa Oyunlarının açılış mərasiminə də qatılmalı idi. Prezident Zurabişvilinin ölkə spikerini hədəf alan etirazçıları dəstəklədiyi bildirilir.
Gürcüstan parlamentinin sədri İrakli Kobaxidze isə nümayəndə heyəti ilə birgə Bakıda keçirilən Qara Dəniz İqtisadi Əməkdaşlıq Təşkilatı (QDİƏT) Parlament Məclisinin Baş Assambleyasının 53-cü iclasını tərk edərək təcili geri qayıdıb. Onun ölkəyə qayıtdıqdan sonra istefa verdiyi bildirilir.
"Gürcü Arzusu" partiyasının parlamentdəki fraksiyasının lideri Mamuka Mdinaradze bildirib ki, parlamentin yeni sədri hakim partiyanın üzvü Arçil Talakvadze olacaq. "Mən deyə bilərəm ki, digər namizəd heç nəzərdən belə keçirilmir və parlament çoxluğu Arçil Talakvadzeni dəstəkləyəcək", - Mdinaradze deyib.
Rusiya Xarici İşlər Nazirliyinin rəsmi təmsilçisi Mariya Zaxarova Tiflisdə baş verənləri bu ölkənin özünə zərər vuran dəhşətli təxribat adlandırıb. Ou barədə öz "Facebook" səhifəsində yazıb.
"Radikalların təxribatı, partiyalar arasında hakimiyyət uğrunda mübarizə... Siyasət... Demokratiya. Və mən ironiya etmirəm – bu, müasir dünyanın reallığıdır", – deyə Zaxarova öz "Facebook" səhifəsində qeyd edib.
O vurğulayıb ki, Rusiya Dövlət Dumasının deputatları, Pravoslav Parlament Assambleyasının prezidenti Sergey Qavrilov Gürcüstana "dəvət və dinc məqsədlə... pravoslav forumun xətti ilə" gəlib və o "heç vaxt Gürcüstan əleyhinə fəaliyyətdə olmayıb".
"Bəli, biz ötən gün turizm mövsümünün qızğın vaxtında törədilən dəhşətli təxribatı gördük. Kim təxribatçılar tərəfindən qızışdırılan kütlənin otellərə hücum etməyəcəyinə zəmanət verə bilər? Kim? Gürcüstanda hazırda buna kim zəmanət verə bilər? KİV-lər də Rusiya XİN-ə xeyli sayda suallar göndərir: Gürcüstana səfər edən rusiyalılara məsləhətləriniz nədir? Şəxsən mənim üçün nəticə kədərlidir: ötəngünkü iğtişaşlar ən çox Gürcüstanın özünə zərər vurdu".
Diplomatın fikrincə, Gürcüstan "Rusiyaya qarşı sanksiya müharibəsini başladan və 5 ildir özü bundan əziyyət çəkən" Avropanın təcrübəsini təkrarladı.
