ABŞ-ın İranın neft-kimya sənayesini hədəfə alan yeni sanksiyaları qüvvəyə minib. Sanksiyalar İranın ballistik raket və nüvə proqramına cavabdeh olan İslam İnqilabı Keşikçiləri Korpusunun iqtisadi qanadına maliyyə dəstəyi göstərdiyi üçün İran Körfəzi Neft-Kimya Sənaye Şirkətini (Persian Gulf Petrochemical Industries Company/PGPIC) hədəfə alır.
Baki-xeber.com xarici mediaya istinadən xəbər verir ki, ABŞ Maliyyə Nazirliyi sanksiyaya holdinqin 39 törəmə şirkətini və xaricdə qərargahlaşan satış agentlərini də daxil edib. Nazirlik bildirib ki, İran Körfəzi Neft-Kimya Sənaye Şirkəti və onun törəmə şirkətləri İranın neft-kimya məhsulları potensialının 40 faizinə, ixracının isə 50 faizinə nəzarət edir.
“Bu şəbəkəni hədəfə almaqla biz İranın neft-kimya sektorunun aparıcı elementini İslam İnqilabı Keşikçiləri Korpusunun dəstəyindən məhrum etmək niyyətindəyik” – deyə, ABŞ-ın maliyyə naziri Stiven Mnuçin bəyanatında bildirib.
Maliyyə Nazirliyinin bəyanatında deyilir ki, İranın Neft Nazirliyi İslam İnqilabı Keşikçiləri Korpusunun iqtisadi və mühəndislik qanadı olan Xatəm əl-Ənbiyəyə, o cümlədən neft və neft-kimya sənayesinin 10 layihəsinə ümumi dəyəri 22 milyard ABŞ dolları miqdarında vəsait ayırıb. Bu məbləğ İslam İnqilabı Keşikçiləri Korpusunun rəsmi büdcəsindən dörd dəfə çoxdur.
Rəsmi Tehran isə ABŞ-ın İranın neft-kimya sənayesini hədəfə alan sanksiyalarına sərt reksiya verib. İranın Xarici İşlər Nazirliyinin sözçüsü Abbas Musəvi ABŞ prezidenti Donald Trampın İranla müzakirə iddialarının mənasız olduğunun ortaya çıxması üçün yalnız bir həftənin yetərli olduğunu deyib. O, dünyanı ABŞ-ın sanksiya kartı ilə beynəlxalq hüququ pozmasına münasibət bildirməyə çağırıb.
ABŞ-ın təzyiqlərinin uğursuz olduğunu və bunun əvvəlki prezidentlər tərəfindən də dəfələrlə sınanmış bir üsul olduğunu deyən Musəvi, "Bu üsul səhvdir və ABŞ hökuməti bu siyasətlə müəyyən olunmuş heç bir hədəfə çata bilməyəcək. ABŞ-ın bu addımları beynəlxalq əlaqələr və hüquq prinsiplərinə zidddir…" deyib.
ABŞ-ın danışıqlarla bağlı açıqlamalarının diqqəti yayındırmağa hesablandığını və bunun real olmadığını ifadə edən Musəvi dünya ölkələrini buna münasibət bildirməyə çağırıb.
"Bütün ölkələr beynəlxalq hüququn əsas prinsiplərini pozan bu addıma münasibət bildirməyə borcludur” – XİN sözçüsü deyib.
