Gürcüstanın keçmiş prezidenti, Odessa vilayətinin keçmiş qubernatoru Mixeil Saakaşvili Varşavadan birbaşa reyslə Kiyevə gəlib.
Baki-xeber.com xarici mediaya istinadən xəbər verir ki, Saakaşvilini Kiyev hava limanında yüzlərlə tərəfdarı bayraq və plakatlarla qarşılayıb.
Saakaşvili deyib ki, onu Ukraynada sevirlər: "Xalqın emosiyasını görürsüz? Görünür, bu ölkədə məni çox sevirlər. Hətta sərhədçi qız dedi ki, mənim üçün darıxıb. Mən Ukraynada 12 il keçirmişəm. İndi özümü qaydaya salır, güzgüyə baxıram."
Saakaşvili Ukraynanın yeni prezidentinə təşəkkür edərək bəyan edib ki, onun siyasi ambisiyası yoxdur. Ukrayna prezidenti Vladimir Zelenskinin onun Ukrayna vətəndaşlığını bərpa etməsini alqışlayan Saakaşvili, bunu “cəsur və dəyərli prezidentin cəsarətli addımı” adlandırıb.
Saakaşvili mayın 28-də mediaya açılqmasında deyib ki, keçmiş prezident Petro Poroşenkonun onun vətəndaşlığını alması dəyərsiz prezident tərəfindən qorxaq hərəkət idi. O, dəstək gördüyü ukraynalılara təşəkkürünü bildirib, onu Ukraynada görmək istəyən çoxsaylı adamların olmasından əminliyini ifadə edib.
Saakaşvili deyib ki, Zelenskinin onun Ukrayna vətəndaşlığını “çox sürətlə” bərpa etməsi onun xarakterini göstərir.
Saakaşvilinin lideri olduğu "Yeni qüvvələr hərəkatı" partiyası isə artıq Radaya keçiriləcək növbədənkənar seçkilərdə iştirak etmək niyyətində olduğunu bəyan edib.
Qeyd edək ki, Saakaşviliyə 2015-ci ildə Poroşenko vətəndaşlıq verib və Odessanın qubernatoru təyin edib. Tiflis rəsmiləri isə həmin ilin dekabrında onun Gürcüstan vətəndaşlığını alıb, Gürcüstan qanunvericiliyinin ikili vətəndaşlığa icazə vermədiyini bildirib.
Poroşenko və Saakaşvilinin münasibətləri korrupsiya iddialarından dolayı pisləşəndən sonra, Poroşenko 2016-cı ildə onu qubernatorlurdan çıxarıb. 2017-ci ilin iyulunda Saakaşvili Yeni Qüvvələr Hərəkatı adlı müxalifət partiyası yaradıb. Bundan sonra Poroşenko onun Ukrayna vətəndaşlığını ləğv edib.
Saakaşvili 2018-ci ilin fevralında Kiyevdə saxlanıb, aeroporta aparılaraq Polşaya yola salınıb. Ukrayna sərhəd xidməti onun 2021-ci il fevralın 13-dək ölkəyə girişini yasaqlayıb.
