Kosovo DİN-in xüsusi təyinatlıları (ROSU) serblərin çoxluq təşkil etdiyi Mitroviçanın şimalında keçirdiyi xüsusi əməliyyat Serbiya ilə gərginliyə səbəb olub.
Baki-xeber.com xəbər verir ki, ROSU-nun 4 serb bələdiyyəsi ərazisində keçirdiyi əməliyyatda aralarında polislərin də olduğu çox sayda adam həbs olunub.
Əməliyyatın əsasən mütəşəkkil cinayətkarlıqla məşğul olan şəxslər və qruplara qarşı keçirildiyi ifadə olunub. Olaylar zamanı 4 kosovolu polis yaralanıb.
Kosovo xüsusi təyinatlılarının keçirdiyi əməliyyatın ardından Serbiya Prezidenti Aleksandr Vuçiç ölkənin silahlı qüvvələrinin və Daxili İşlər Nazirliyi xüsusi təyinatlılarının tam hərbi hazırlıq vəziyyətinə gətirilməsinə əmr verib. Prezident Vuçiç bölgədə baş verə biləcək silahlı qarşıdurmaya serb polis və ordusunun müdaxilə edə biləcəyini deyib.
Vuçiç Avropa Birliyinə də səslənərək, Kosovo DİN-in xüsusi təyinatlılarının dərhal sözügedən bölgədən çəkilmələrinə dair çağırış edib.
A.Vuçiç parlament qarşısındakı çıxışında isə bildirib ki, Serbiya etiraf etməlidir ki, daha Kosovodakı vəziyyətə nəzarət etmir. O qeyd edib ki, Serbiya Kosovo ilə münasibətlərdə seçim qarşısındadır: ya "dondurulmuş münaqişə" rejimi saxlanmalı, ya da əlaqələr qurulmalıdır.
"Mən yalan və özünüaldatmanı davam etdirməmək qərarına gəldim. Hamıya deyirəm ki, Kosovo və Metoxiyada Serbiyanın hakimiyyəti yoxdur. Biz öz ictimaiyyətimizi aldatmamalıyıq", - prezident deyib.
Vuçiç Kosovo ilə münasibətlərin yaxşılaşdırılmasının tərəfdarı olduğunu vurğulayıb.
Prezident həmçinin bu məsələdəki köməyinə görə Rusiya lideri Vladimir Putinə təşəkkür edib.
Vaxtilə Serbiyanın tərkibində olan Kosovo və Metoxiyada separatçı hərəkat 1999-cu ildə baş qaldırıb. 2008-ci ildə Kosovo müstəqilliyini elan edib.
Kosovo Baş nazir Ramuş Haradinay isə Serbiyanı ölkəsinin daxili işlərinə müdaxilə etməməyə çağırıb: "Bu basqın bu gün Kosovada mütəşəkkil cinayətkarlığa qarışanlara qarşı bir əməliyyatdır və Serbiya Kosovanın daxili işlərinə müdaxilə etməməlidir.
Cinayət və qaçaqmalçılıq ümumi inkişafımız üçün birbaşa təhdiddir və bu etnik mənşəyə əsaslanmamalıdır. Serbiya hökuməti mütəşəkkil cinayətkarlıqla mübarizədə səylərimizi baltalamamalıdır".
