Çin və Rusiya Fələstinlə bağlı gələn ay Bəhreynin paytaxtı Manamada keçirilməsi planlaşdırılan iqtisadi seminarda iştirak etməyəcək.
Baki-xeber.com xəbər verir ki, bunu Çin Xalq Respublikasının Fələstindəki səfiri Qo Vei, Fələstin dövlət başçısı Mahmud Abbasın xarici əlaqələr üzrə müşaviri Nebil Şaasla görüşündə deyib.
Fələstinin rəsmi agentliyi WAFA-nın məlumatına görə, səfir, Çin və Rusiyanın 25-26 iyunda ABŞ-ın dəstəyi ilə Bəhreyndə keçiriləcək "Xoşbəxtlik üçün sülh" adlı iqtisadi seminara qatılmamaqla bağlı razılığa gəldiyini bildirib.
"Çin, Fələstin xalqına dəstəyi davam etdirəcək. Bu dəstək 1967-ci il sərhədləri daxilində paytaxtı Şərqi Qüds olan müstəqil Fələstin dövlətinin qurulmasına qədər də davam edəcək" - Çin səfiri deyib.
Fələstin Azadlıq Təşkilatı (FAT) da bir neçə gün əvvəl Manamada gələn ay keçirilməsi planlaşdırılan iqtisadi seminarın Fələstin xalqının maraqlarına xidmət etmədiyini, bu səbəbdən Fələstinin seminarda iştirak etməyəcəyini bildirmişdi.
Qeyd edək ki, bir neçə gün əvvəl Bəhreyn xarici işlər naziri Xalid bin Əhməd Al Xəlifə, ABŞ-ın "Əsrin müqaviləsi" planına hazırlıq olduğuna görə fələstinlilərin etirazına səbəb olan "Xoşbəxtlik üçün sülh" adlı iqtisadi seminarın əsas məqsədinin Fələstin xalqını gücləndirmək olduğunu iddia etmişdi.
