ABŞ müdafiə naziri vəzifəsini icra edən Patrik Şanahan, Orta Şərqə 5 min, və ya 10 min əsgər göndərəcəklərinə dair iddiaları təkzib edib.
Baki-xeber.com xəbər verir ki, Pentaqon rəhbəri, buna baxmayaraq, bölgəyə əlavə qüvvələrin göndərilməsini istisna etməyib.
“Hazırda diqqətimizi yönəltdiyimiz əsas məsələ, Orta Şərqdə kifayət qədər müdafiə gücünə sahib olub-olmamağımızdır” - Pentaqon rəhbəri deyib.
ABŞ-ın bölgəyə hərbi qüvvə yığaraq İranı provokasiyaya çəkdiyinə dair iddialara gəlincə Şanahan deyib: "Bunlar müharibə ilə bağlı deyil. Orta Şərqdə vəzifələrimiz var. Bunlar, sabitliyi təmin etmək, Suriya və İraqda terrorla mübarizə, “Əl Qaidə”nin Yəməndə məğlub edilməsi və eləcə də İordaniya və İsrailin qorunmasıdır”.
Şanahan, bölgəyə 5 min qoşun göndəriləcəyi iddialarına da toxunaraq bu rəqəmlərin doğru olmadığını deyib. Ancaq o, buna baxmayaraq, İrana qarşı alınan tədbirlər çərçivəsində bölgəyə əlavə qüvvələrin göndərilməsini də istisna etməyib.
Qeyd edək ki, ABŞ prezidenti Donald Tramp İranın neft ixracını sıfıra endirməyə çalışmaq və İrandan gələn təhlükələrə qarşı İran Körfəzində ABŞ-ın hərbi mövcudluğunu artırmaq qərarını elan edəndən sonra Tehranla Vaşinqton arasında gərginlik artıb. Lakin Tramp ritorikasına baxmayaraq müvəqqəti müdafiə naziri Patrik Şanahana deyib ki, o, İranla müharibə aparmaq istəmir.
Əgər ABŞ regiona əlavə qoşun göndərərsə bu Tramp üçün mövqe dəyişikliyi olacaq. O, daha öncə dəfələrlə regionda ABŞ qoşunlarının sayını azalmaq istədiyini bildirib.
Tramp ötən dekabr ayında Suriyadan 2 min ABŞ qoşunu çıxaracağını elan edib. Lakin fevral ayında 400 qoşunu saxlamağa qərar verib.
