ABŞ 2015-ci ildə Bəşər Əsəd rejiminin hakimiyyətdən qəflətən devrilməməsi üçün Rusiya ilə danışıqlar aparıb.
Baki-xeber.com xəbər verir ki, bunu keçmiş ABŞ prezidenti Barak Obama dövründə Müdafiə Nazirliyində (Pentaqon) müşavir köməkçisi olan Endryu Eksum deyib.
ABŞ-ın Suriyada Əsəd rejiminin yıxılmasından qorxduğunu bildirən Eksum, xüsusən 2015-ci ildə daha çox narahat olduğunu deyib: "O dövrdə Suriya məsələsində Rusiya ilə əməkdaşlıq etmək fikri mənim olduğum nazirlikdə qəbul edilmirdi, ancaq tapşırıq birbaşa prezidentdən gələndə əlimizdən gələni etdik. Bu proses 2015-ci ilin yayında başlayıb".
Eksum o vaxt Obamanın Əsəd rejiminin qəflətən yıxılmasının həm Suriyada qeyri-müəyyənliyə səbəb olacağından, həm də İsrailin təhlükəsizliyinə təhlükə yaradacağından narahat olduğunu qeyd edib. Obamanın Əsəd rejimi yıxılmasın deyə Rusiya ilə təmas qurulması tapşırığını verdiyini bildirən Eksum, nəticədə həmin vaxt Əsədin devrilmədiyini ifadə edib.
Eksum ABŞ-ın Suriyada iki əsas məqsədi olduğunu deyib: "Nəticədə bu müharibəni Rusiya və tərəfdaşları qazandı. Biz isə öz maraqlarımızı əsas götürdük - bunlar İsrailin təhlükəsizliyini təmin etmək və İŞİD-i məğlub etmək idi".
Pentaqonun keçmiş rəsmisi ABŞ-la Rusiya arasında Əsədlə bağlı danışıqların detallarını açıqlamayıb.
