ABŞ və Rusiya Venesuelada hərbi çevriliş cəhdinə münasibət bildirib. Baki-xeber.com xəbər veri ki, ABŞ prezidenti Donal Tramp Venesueladakı hadisələrlə bağlı Twitter hesabından açıqlama verib.
“Venesueladakı hadisələri diqqətlə izləyirəm. ABŞ Venesuela xalqı və onların azadlığını dəstəkləyir” - Tramp yazıb
Ağ Ev Venesuela hadisələri ilə bağlı ABŞ prezidentinin məlumatlandırıldığını və vəziyyətin yaxından monitorinq edildiyini bəyan edib.
Dövlət katibi Mayk Pompeo isə, ABŞ hökumətinin Venesuela xalqına tam dəstək verdiyini bildirib. ABŞ-ın milli təhlükəsizlik məsələləri üzrə müşaviri Con Bolton Venesuela ordusunun konstitusiya və xalqı müdafiə etməli olduğunu deyib. O, Amerikanın Venesuela xalqı yanında durduğunu da əlavə edib.
Rusiya prezidentinin mətbuat katibi Dmitri Peskov bəyan edib ki, bu məsələni Təhlükəsizlik Şurasının üzvləri ilə Rusiya prezidenti Vladimir Putin də müzakirə edib: "İclas zamanı Venesuelada dövlət çevriliş cəhdinə dair gələn xəbərlə bağlı bu ölkədəki vəziyyətə böyük diqqət ayrılıb".
Rusiyanın Xarici İşlər Nazirliyi isə zorakılıqlara görə müxalifəti tənqid edərək, silahlı qüvvələrin qarşıdurmalara cəlb edilməsini xəyanətkarlıq cəhdi adlandırıb.
BMT-nin baş katibi Antonio Quterres maksimum təmkinə səsləyib.
Maraqlıdır ki, müxalifət lideri Quaydonu rəsmən tanıyan İspaniya çevrilişin əleyhinə olduğunu bildirib.
Qeyd edək ki, Venesuelada müxalifətlə bağlılığı olan bir qrup hərbçi hökuməti devirmək üçün hərəkətə keçib. Ölkənin kommunikasiya naziri Horhe Rodriqez kiçik bir qruplaşmanın çevrilişə cəhd göstərdiyini deyərək, xalqı buna yol verməməyə və sülhü seçməyə çağırıb. Hökumət hərbi çevrilişin yatırılması üçün addımlar atıldığını bəyan edib.
Prezident Nikolas Maduro xalqı konstitusiya quruluşunu qorumaq üçün küçələrə çıxmağa çağırıb.
Ölkədə hökumət tərəfdarlarına prezident sarayı Mirafloresin qarşısına, müxaliflərə isə hadisələrin yaşandığı Karlota hərbi hava bazası ətrafında toplaşmaq çağırışları edilir.
Müdafiə naziri Vladimir Padrino Lopres isə deyib ki, hərbi qüvvələr Maduronu dəstəkləyir. Nazir bildirib ki, ordu, müxalifət lideri Xuan Quaydonun rəhbərliyi altında başlayan hərbi çevrilişin qarşısını alacaq.
Çevrilişə cəhd edən hərbçilər qollarına mavi lent bağlayıblar.
