İran prezidenti Həsən Ruhani ABŞ təzyiqləri dayandırdığı və üzr istədiyi halda danışıqlar masasına oturacaqlarını bəyan edib.
Baki-xeber.com Türkiyə mediasına istinadən xəbər verir ki, Ruhani ABŞ-ın İran üzrə xüsusi nümayəndəsi Brayan Hukun İranla nüvə və raket proqramını əhatə edən yeni bir müqavilənin bağlanması çağırışına cavab verib.
ABŞ-ın müzakirə mövzusunda ciddi olmadığını bildirən Ruhani "Şübhəsiz ki, zorakılıq və yalanla söykənən bir müzakirə tələbinin qəbul edilməsi heç bir nəticə verməyəcək. Belə bir müzakirə zillət və təslimiyyət deməkdir" ifadəsini işlədib.
Ruhani, yalnız ABŞ-ın təzyiqlərini sona çatdırması və hüquqa zidd əməllərinə görə üzr istəyəcəyi halda bu ölkə ilə danışıqlar masasına oturacaqlarını vurğulayıb: "İran xalqı qeyri-hüquqi təşəbbüslərə qarşı yeganə yolun müqavimət olduğunu yaxşı bilir. Müzakirə yalnız bütün təzyiqlərin aradan qaldırılmasından sonra gediləsi bir yoldur. Biz müharibə və müdafiə adamı olduğumuz kimi, hər zaman müzakirə və diplomatiya adamı da olduq".
İran prezidenti, ABŞ-ın İranın neft ixracını sıfira endirmə hədəfinin mümkün olmayacağını və İranın fərqli üsullarla neft satışına davam edəcəyini qeyd edib: "ABŞ dünya neft bazarını əlində saxlamaq gücünə malik deyil. Amerikalılar bu məsələdə səhv yoldadırlar".
İran neftinə qoyulan embarqoların səbəb olduğu boşluqları dolduracaqlarını açıqlayan, Səudiyyə Ərəbistanı və Birləşmiş Ərəb Əmirliklərini də hədəf alan Ruhani İraqın devrilmiş lideri Səddam Hüseynin 1990-cı ildə Küveyti işğal etdiyi zaman İrandan işğala dəstək istədiyini, lakin İran liderlərinin bu tələbi rədd etdiyini söyləyib.
Səddamın sabiq İran prezidenti Əli Əkbər Haşimi Rəfsəncaniyə məktub yazaraq Tehrandan işğala dəstək verməməsini, və ya səssiz qalmasını istədiyini bildirən Ruhani sözünə belə davam edib: "Səddam məktubunda İranla 800 kilometr sərhədə malik olacağını açıq şəkildə yazmışdı. Bu da, Küveytdən sonra Səudiyyə Ərəbistanı, Oman, Birləşmiş Ərəb Əmirlikləri və Qətəri da işğal etmək həvəsində olduğunu göstərirdi. Rəhbər (İran lideri Xamenei) və mərhum Haşimi Rəfsəncani qəti qərarlar qəbul etməsəydilər, bu gün Səudiyyə Ərəbistanı və Birləşmiş Ərəb Əmirliklərindən əsər-əlamət qalmayacaqdı".
