24/07/2019 05:10
728 x 90

Ukraynanın yeni prezidenti... filmdə müəllimlikdən prezidentliyə yüksələn Zelenskinin rolu real oldu

img

Ukraynada prezident seçkilərilə bağlı “exit-poll”un nəticələri açıqlanıb. Yerli təşkilatların keçirdiyi “exit-poll”un nəticəsinə görə, Vladimir Zelenski böyük üstünlüklə qalib gəlib.

Baki-xeber.com xəbər verir ki, teleseriallarda prezident rolunun ifaçısı kimi tanınmış aktyor və komediya ustası Zelenski 73,2, Petro Poroşenko isə 25,3 faiz səs toplayıb.

Exit-poll”ların nəticəsindən sonra Vladimir Zelenski bəyanatla çıxış edərək bütün ukraynalılara təşəkkür edib.

Daha sonra brifinq keçirən Zelenski maraqlı bəyanatlar verib. Zelenski Prezident Administrasiyasında kifayət qədər ixtisarlar aparacağını bəyan edib: “Andiçmə mərasimindən sonra kadr siyasəti ilə bağlı qərarlar verəcəyəm. Öncə Ukraynanın Baş prokuroru Lutsenkonu vəzifəsindən uzaqlaşdıracağam. Lutsenko köhnə komandadır, yeni simalar gətiriləcək”.

Zelenski seçicilərin etimadını doğruldacağını vəd edib: "Mən hələ rəsmi prezident deyiləm, bütün postsovet ölkəsinin vətəndaşlarına üzümü tutaraq deyə bilərəm ki, bizdə hər şey mümkündür”.

Rusiya ilə münasibətlərə gəlincə, Zelenski bildirib ki, o, ilk növbədə, Rusiyada həbsdə və əsirlikdə olan ukraynalıların vətənə qaytarılmasına çalışacaq. Zelenski Moskva ilə danışıqları Normandiya formatında davam etdirəcəyini və Ukraynanın şərqində münaqişənin Minsk razılaşmaları əsasında, həllinə çalışacağını bildirib.

Seçkilərdə məğlub olduğunu etiraf edən Poroşenko isə Zelenskini qalib gəlməsi münasibətilə təbrik edib. Poroşenko “exit-poll”arın nəticəsinin ona rəqibinə zəng edərək təbrik etmək üçün əsas verdiyini deyib: “Nəticələr göz qabağındadır. Zəng edib təbrik etmək lazımdır. Sivil ölkələrdə edildiyi kimi. Ukrayna xalqı belə qərara gəldi və mən bu qərarı qəbul edirəm”...

Poroşenko siyasətdən getməyəcəyini də deyib. “Mən növbəti ayda dövlət başçısı vəzifəsini tərk edəcəyəm. Əhalinin çoxluğu bunu istədi. Mən ofisdən gedirəm, siyasətdən yox! Bizim komanda həyata keçirdiyi siyasəti davam etdirəcək, buna əmin ola bilərsiniz. Ukraynanın inkişafı, uğurları üçün mübarizəmizi davam etdirəcəyik”, - Poroşenko deyib.

Bununla da “Xalqın xidmətçisi” teleserialında təsadüfən dövlət başçısı olan tarix müəlliminin rolunu canlandıran Vladimir Zelenskinin rolu gerçəyə çevrilib.

Son xəbərlər