Pentaqon və ABŞ kəşfiyyatı Ağ Evin İran İnqilabı Keşikçıləri Korpusunun (SEPAH) terrorçu təşkilat olaraq tanınması təklifinə sərt etiraz edib.
“The Washington Post” qəzetinin xəbərinə görə, son günlər ABŞ-ın müdafiə və kəşfiyyat qurumları bir neçə dəfə Ağ Evə xəbərdarlıq edərək, SEPAH-ın terrorçu təşkilatlar sırasına aid edilməsinin nəinki ABŞ-ın İraqdakı hərbi qüvvələrini təhlükə altına salacağını, eyni zamanda “İslam dövləti” ekstremist qruplaşmasına qarşı aparılan birgə mübarizəyə də ciddi ziyan vuracağını bildirib. Sözügedən qurumlar, eyni zamanda, hökumətin nəzdində fəaliyyət göstərən təşkilatların barəsində sanksiyaların yolverilməz olduğunu bildirib, SEPAH-ın isə İranın elit qüvvələri olduğuna diqqət çəkiblər.
Ağ Evin rəsmi nemayəndəsi isə bildirib ki, məlum qərar hələlik baxış mərhələsindədir. O deyib ki, həmin qərarın qüvvəyə minməsi müdafiə və kəşfiyyat qurumlarından asılı deyil. “Bu məsələ yalnız bizdən asılıdır”- o deyib. “The Washington Post” isə yazır ki, əslində SEPAH və onun törəmə strukturları 2007-ci ildən terroru dəstəklədiyinə görə Maliyyə Nazirliyinin sanksiyalar siyahısında yer alır. Lakin terroru dəstəkləməklə terrorçu olmaq fərqli şeylərdir və bu üzdən Dövlət Departamentinin onu terrorçu qruplar siyahısına daxil etməsi ciddi fəsadlara yol açmaq iqtidarındadır. Bu həm də İran vətəndaşlarının digər ölkələrə çıxışına və İslam Respublikasının beynəlxalq maliyyə sisteminə qoşulmasına əngəl törədəcək. Üstəlik İran onsuz da Sudan və Suriya ilə yanaşı Vaşınqtonun terrora sponsorluq edənlər siyahısında yer alır. Qəzet yazır ki, Obama administrasiyası da öz dövründə bu məsələnin üzərində dayanmışdı, lakin yekunda “belə bir addımın xeyirli olmayacağı” qənaətinə gəlmişdi. Lakin qəzetin yazdığına görə, sələfindən fərqli olaraq, hazırkı Ağ Ev administrasiyası SEPAH-ın terrorçu qruplar siyahısına salınmasına çox həvəsli görünür. Əslində bazar gününə təyin olunan məsələnin müzakirəsi isə gələn həftəyə keçirilib.
İrana gəldikdə isə, İslam Respublikası bu təhdidlərin heç bir mənası olmadığını bildirir. SEPAH komandırı Məhəmməd Əli Cəfəri həftənin cümə günü Həmədanda etdiyi çıxışında bildirib ki, hətta amerikan analıtıkləri də İranla konfrontasiyanın ABŞ-ı ciddi risq qarşısında qoyduğunu etiraf edir. O, amerikan siyasətçilərini İranı təhdid etməkdən əl çəkməyə və bunun nəticələrinin yaxşı olmayacağını dərk etməyə çağırıb.
Məsələyə İranın Ali Dini Lideri Əli Xamneyi də münasibət bildirib. O deyib ki, ABŞ prezidenti Donald Tramp “məndən qorxun” deyir. ”Yox, bu olmayacaq. Fevralın 10-da İslam İnqilabının 38-ci ildönümündə İran xalqı göstərəcək ki, onu təhdidlərlə qorxutmaq olmaz”- deyə o bildirib.
İstənilən halda isə ABŞ-İran münasibətlərinin kəskinləşməsi dünyanın beynəlxalq münasibətlər sistemində dönməz proseslərin yaranacağına işarə sayılır və perspektivin ürəkaçan olmayacağı göz önündədir...
Samirə
