Almaniya kansleri Angela Merkel Almaniyada qanuni olaraq mümkün olan hər yerdə niqaba qadağa qoyulması çağırış edib.
Baki-xeber.com xəbər verir ki, Merkel bunu lideri olduğu Xristian Demokrat İttifaqı (CDU) partiyasının 29-cu qurultayında çıxış edərkə deyib. Almaniya kansleri deyib ki, müsəlman qadınların vücudunu tam örtən burqa hüququn buna imkan verdiyi bütün yerlərdə qadağan edilməlidir: “Biz ünsiyyət zamanı üzümüzü bağlamırıq. Bu bizim üçün çox vacibdir. Məhz buna görə qanun çərçivəsində üzü tamamilə örtən geyimə qadağa qoyulmalıdır, bu bizim ölkə üçün ziddir”.
O, məktəblərdə, məhkəmələrdə və başqa dövlət binalarında burqanın qadağanını dəstəklədiyini bəyan edib.
Almaniyanın daxili işlər naziri də bir müddət əvvəl niqabın qismən qadağan edilə biləcəyini demişdi. Ancaq bunu tam qadağası Almaniya konstitusuiyasına zidd ola bilər.
Təhlilçilər deyirlər ki, Angela Merkel təkrar olaraq CDU-nun lideri seçilib, lakin gələn il keçiriləcək seçkidə onu ifrat sağçı və antmiqrant AfD partiyasından güclü rəqabət gözləyir. Merkel ölkəyə bir milyonadək qaçqının gəlməsinə icazə verdikdən sonra rəy sorğularında populyarlığını xeyli itirib. Buna baxmayaraq 2005-ci ildən bəri Almaniyaya rəhbərlik edən mərkəz-sağçı kansler ictimaiyyət arasında hələ də geniş dəstəyə malikdir. Müxbirlər bildirirlər ki, CDU-nun Essen şəhərində keçirilən qurultayında xanım Merkelin niqab qadağası bəyanatını gurultulu və sürəkli alqışlarla qarşılayıblar.
Politoloqlar deyirlər ki, Almaniya konstitusiyası niqabın tam qadağan olunmasına çətin imkan yaratsa da, xanım Merkel bu mühafizəkar geyim formasını xoşlamadığını açıq bildirib. Almaniyada üzlərini bağlayan müsəlmanların sayı bir elə də çox deyil, lakin kanslerin bəyanatı daha çox simvolik xarakter daşıyır.
Populist və ifrat sağçı partiyalardan şiddətli rəqabətlə üzləşən Merkel miqrantlarla bağlı mövqeyini sərtləşdirməkdə davam edir. Məsələn indi cinayət törətmiş qaçqınların ölkədən deportasiyası proseduru xeyli sadələşdirilib.
“Alman mədəniyyətində qadının üzünü tam örtməsi qeyri-məqbuldur və üzü örtən rübənd hüququn imkan verdiyi bütün yerlərdə qadağan edilməlidir” – deyib kansler.
