Litvalılar Rusiya işğalına hazırlaşırlar. "The Guardan" yazır ki, ölkənin Müdafiə Nazirliyi Rusiya işğalının baş verdiyi təqdirdə Litva vətəndaşlarının nə etməli olduqları barədə təlimat kitabçasını 30 min tirajla çap edib.
75 səhifəlik kağız cildli kitabça Fəal Müqavimət Təlimatı adlanır. Qəzet yazır ki, ABŞ prezident seçkilərində Donald Trampın qələbəsindən sonra Litva Rusiya işğalının xofu içində yaşayır, beləki respublikaçı milyarder namizəd Vaşinqtonun heç də bütün NATO müttəfiqlərini müdafiıə etməli olmadığını bəyan etmişdi. Bu da qeyd olunur ki, Krım Rusiya tərəfindən ilhaq olunduqdan sonra Litvada belə təlimat kitabçalarından üçü buraxılıb.
"Fövqəladə Vəziyyətlərdə və Müharibə Şəraitində Necə Hərəkət Etməli?" adlı birinci kitabda
vətəndaşlara işğalçılara qarşı itaətsizlik, tətillər, haker hücumları və dezinformasiyadan istifadə tövsiyə olunurdu. Kitabçada deyilirdi ki, çöldən güllə səslərinin gəlməsi hələ dünyanın axırı deyildir.
"Fövqəladə Vəziyyətlərdən və Müharibələrdən Sağ Çıxmağa Hazırlıq: Ciddi Tövsiyələrə Ümidli Baxış" adlanan ikinci nəşr isə 2015-ci ildə işıq üzü görüb.
"The Guardian" yazır ki, sonuncu təlimat kitabçasında Rusiya konkret olaraq potensial işğaslçı kimi təsvir edilir. Bu kitabçada Rusiya silahlarının təfərrüatlı təsviri verilir və vətəndaşlara düşməndən casusluq etməyin üsulları öyrədilir.
"Nə etməli" təlimatlarının üçü də Litva Müdafiə Nazirliyinin saytında yerləşdirilib. Bu materiallar Litva Tüfəngçilər İttifaqının dəstəyi ilə hazırlanıb. Kitabçalar məktəblərə, kitabxana və başqa ictimai müəssisələrə paylanıb.
26 yaşlı Litva ordusu könüllüsü Povilas Poderskis deyir ki, bu təlimatlar əhalinin özümümüdafiəsi üçün çox dəyərlidir. Onun fikrincə, həm də belə kitabçaların buraxılması adamların işğal xofunu bir qədər azaldıb.
"The Guardian" yazır ki, ötən oktyabrda Rusiyanın Litva ilə həmsərhəd Kalininqrad vilayətinə yaxın mənzilli ballistik raketləri yerləşdirdiyinə dair xəbər, habelə Rusiya prezidentinə rəğbət göstərən Donald Trampın ABŞ prezidenti seçilməsi adamların narahatlığına səbəb olub.
Buna baxmayaraq rəsmilər təlimat kitabçaları ətrafındakı hay-küyün köpünü almağa çalışıblar. Litvanın xarici işlər naziri Linas Linkevičius adamları toxtatmağa çağırıb. O deyib ki, Donald Tramp prezident ofisinə gəldikdən sonra Litva və ABŞ münasibətləri həmişə olduğu kimi davam edəcək və Amerika Litvanın strateji müttəfiqi olaraq qalacaq.
