Avropada miqrantlara qarşı kifayət qədər sərt mövqe sərgiləndiyi danılmaz həqiqətdir və proseslər Qərb ölkələrinin mühacirlərə qarşı daha da radikallaşmaqda olduğunu göstərir. Miqrantların gəlişini əngəlləmək üçün isə son dövrlərdə xüsusi diqqət mərkəzində olan məsələlərdən biri bununla bağlı qanunvericiliyin sərtləşdirilməsidir. Bu fonda Almaniya daha çox seçilməkdədir. Belə ki, Almaniya Buntestaqı miqrant axınının qarşısını almaq məqsədilə qaçqınlar üçün qaydaları sərtləşdirib.
Yeni qaydalara əsasən, qaçqın statusunu almaq üçün ərizənin nəzərdən keçirilmə müddəti 6 aya qədər uzadılıb və onlara sosial müavinət pullaə deyil, ərzaq və ilkin ehtiyac malları ilə ödəniləcək. Kosovo, Albaniya və Çernoqoriyadan olan məcburi köçkünlər bundan sonra Almaniyada qaçqın statusu ala bilməyəcək. Onların ölkələri təhlükəsiz dövlətlərin siyasına salınıb. Qaydaları pozanlar tez bir zamanda öz vətəninə göndəriləcək. Ölkənin miqrasiya siyasətini alman mediası da sərt tənqid edir. "Frankfurter Allgemeine Zeitung" qəzetində "Siz hansı ölkədən danışırsınız, xanım Merkel?" sərlövhəli yazı Almaniya hökumətinin qaçqınlar barəsində siyasətinin tənqidinə həsr edilib: "Ölkəyə qaçqınlar axınını necə dayandırmalı? AFR kansleri öz ölkəsinə belə bir sual verir və 3 min kilometr uzunluğunda sərhədləri göstərir. Bəs, xarici sərhədlərinin uzunluğu 14 min kilometr olan Avropa İttifaqı bu məsələnin öhdəsindən necə gəlsin? Angela Merkel Macarıstan sərhədlərində ucaldılmış hasarları nümunə göstərir. Bu hasarlara görə Budapeştin ünvanına çoxlu tənqidlər səslənir. Lakin Avropa İttifaqının ümumiyyətlə mövcud olması və başqalarına kömək edə bilməsi üçün xarici sərhədlərin müdafiəsi zəruri ilkin şərtlərdən biridir. Avropa İttifaqı ölkələri arasındakı sərhədlər yalnız bu şərtlə açılıb. Üstəlik, bu nəhəng layihəyə görə Avropa İttifaqının dərinləşməsi və genişlənməsi, başqa sözlə desək, onun inteqrasiya və yeni üzvlər üçün, o cümlədən Asiya və Afrika ölkələri ilə assosiasiyalar və tərəfdaşlıq üçün açıq olması nəzərdə tutulub. Almaniya isə siyasi sığınacaq hüququna malik olmayan minlərlə miqrantı deportasiya edə bilər. AFR-ə gələnlərin işlərinə sürətlə baxmaq və onların deportasiya, yoxsa inteqrasiya edilməsi məsələsini həll etmək olar".
Angela Merkel özü isə vurğulayıb ki, miqrant məsələsini həll etmək üçün Avropa İttifaqının ümumi strategiyaya malik olması vacibdir. Onun sözlərinə görə, Avropa İttifaqının xarici sərhədlərini möhkəmləndirmək, sığınacaq almaq hüququna malik olmayan qaçqınların geri qaytarılması prosesini sürətləndirmək, insanların Avropaya kütləvi axınının səbəblərinin aradan qaldırılması üzərində işləmək, Suriya münaqişəsinin həllini axtarmaq vacibdir. Bütün bunlar isə miqrantların Avropaya, o cümlədən Almaniyaya keçməsinin mümkünsüz olduğunu göstərir. Digər Avropa ölkələrində də analoji problem müşahidə olunur.
Çexiyada miqrantların qəbul edilməsinin əleyhdarları bununla bağlı Praqadakı Müqəddəs Vatslav meydanında nümayiş keçirməyi planlaşdırır. "Açıq Avropa və insan hüquqları uğrunda" aksiyasının təşkilatçıları bildirir: "Qaçqınlara münasibətdə nifrət hissini qızışdıranlar tərəfindən təşkil edilən aksiyaların sayı sürətlə artır. Demək olar ki, hər həftə Çexiyanın hansısa şəhərində bu cür toplantılar təşkil olunur". Sentyabr ayında bu cür nümayişlərdə yüzlərlə Çexiya sakini iştirak edib.
Digər Avropa ölkəsi olan Bolqarıstanın baş naziri Boyko Borisov ölkənin sərhədlərinin "qanunsuz miqrantların" üzünə bağlandığını bildirib. Baş nazir deyib ki, ölkəyə yalnız qanuni əsaslarla girmək mümkündür. Onun sözlərinə görə, ölkəyə yalnız minik və yük avtomobilləri buraxılır və bunun sayəsində Avropa İttifaqı ölkələrinə keçməyə səy göstərən miqrant axınını, az da olsa, tənzimləmək mümkün olub. Polşanın da bir neçə şəhərində etirazlar baş qaldırıb. Etirazların səbəbi məhz Avropaya axın edən miqrantlar olub. Varşavanın mərkəzi meydanına toplaşan aksiya iştirakçıları miqrantların ölkədə yerləşdirilməsi planlarına etiraz edib. Etirazçılar "Polşa polşalılarındır!", "Miqrantlara yox!" kimi şüarlar səsləndirib.
Bundan əvvəl isə Katovitse şəhərində 3 mindən çox adam miqrantlar əleyhinə etiraz aksiyasına toplaşıb. Xatırladaq ki, son aylarda Avropa ölkələrinə axın edən miqrantların qəbul edilməsilə bağlı Avropa Birliyi 120 min nəfərlik kvota elan edib. Amma bu sayda miqrantın qəbul ediləcəyinə şübhələr artır. Çünki Avropa ölkələrinin bir çoxu qəti şəkildə miqrant qəbuluna qarşı çıxır.
Tahir TAĞIYEV
