İran və ABŞ-İsrail ittifaqı arasındakı gərginlik sənaye və nüvə infrastrukturunun hədəfə alınması ilə daha təhlükəli vəziyyətə çatıb. İranın xarici işlər naziri Abbas Ərakçi İsrailin ABŞ-la koordinasiyalı şəkildə İranın strateji sənaye və nüvə obyektlərini hədəf aldığını açıqlayıb və bunun bədəlinin çox ağır olacağını bəyan edib. Bu sərt açıqlama ilə eyni vaxtda İran İnqilab Keşikçiləri Korpusu (SEPAH) böyük bir qisas əməliyyatının başladığını elan edərək, bölgədəki ABŞ-la əlaqəli şirkətlərin və İsraillə müttəfiq olan sənaye obyektlərinin işçilərinə "dərhal təxliyə" xəbərdarlığı edib.
Ərakçi İsrailin İranın ən böyük iki polad zavoduna, bir elektrik stansiyasına və mülki nüvə obyektlərinə zərbə endirdiyini bildirib. Hücumun ABŞ-la koordinasiyalı şəkildə həyata keçirildiyini deyən Ərakçi, Vaşinqtonun diplomatik ritorikasının bu hücumla çökdüyünü bildirib: “Bu hücum ABŞ prezidentinin diplomatiya üçün uzatdığı müddətə ziddir. İran İsraili cinayətlərinə görə çox ağır bədəl ödəməyə məcbur edəcək."
Ərakçinin diplomatik sərt açıqlamalarından sonra İranın hərbi qanadından da təhdid dolu açıqlama gəlib. SEPAH ABŞ və İsrailin İran sənaye mərkəzlərinə hücumlarından sonra bölgədə fəaliyyət göstərən ABŞ-la əlaqəli şirkətlərə və İsraillə müttəfiq olan ağır sənaye müəssisələrinə xəbərdarlıq edib.
Sənaye obyektlərinə hücumlardan sonra İranın qisas hücumlarına başladığı bildirilən açıqlamada deyilir: "Bölgədə ABŞ səhmdarları olan sənaye şirkətlərinin, eləcə də İsraillə müttəfiq olan ağır sənaye müəssisələrinin işçilərini, təhlükəsizliklərini təmin etmək üçün dərhal iş yerlərini tərk etməyə çağırırıq.
Bu cür sənaye obyektlərinin yaxınlığında yaşayanlar da hücumlar baş verənə qədər ən azı bir kilometr məsafədə yaşayış yerlərini tərk etməlidirlər".
SEPAH Hərbi Hava Qüvvələri komandanı briqada generalı Məcid Musəvi də ABŞ və İsrailin İrandakı sənaye obyektlərinə hücumlarından sonra verdiyi açıqlamada hər iki ölkəni hədələyib: "Bizi əvvəllər bir dəfə sınadınız. Bu dəfə hesab gözə göz, dişə diş olmayacaq. Gözləyin".
Tahir TAĞIYEV
