ABŞ prezidenti Donald Tramp hazırda müharibə vəziyyətində olan İranla davam edən danışıqlarla bağlı yeni açıqlamalar verib. Tramp, iranlıların neft və təbii qazla bağlı onlara hədiyyə göndərdiyini və nüvə məsələsində razılığa gəldiklərini iddia edib.
İranlılarla danışıqların aktiv şəkildə davam etdiyini deyən Tramp, Tehranda kiminlə danışdıqlarını açıqlamayıb. O, ABŞ tərəfindən vitse-prezident Vens, dövlət katibi Marko Rubio, xüsusi nümayəndə Stiv Uitkoff və kürəkəni Cared Kuşnerin prosesdə iştirak etdiyini bildirib. Tramp İranla danışıqların başlanğıc nöqtəsinin "nüvə silahına sahib olmamaqla" bağlı olduğunu bildirib: "Onlar (İran) heç vaxt nüvə silahına sahib olmayacağı barədə razılığa gəliblər. Əvvəlcədən nə baş verəcəyini demək istəmirəm, amma iranlılar heç vaxt nüvə silahına sahib olmayacaqlarını qəbul ediblər".
Tramp İranın ABŞ-la razılığa gəlmək istədiyini iddia edib: "Bütün İran liderləri getdi. Heç kim kiminlə danışacağını bilmir, amma biz düzgün insanlarla danışırıq".
Digər tərəfdən, Tramp bildirib ki, onlar İran liderlərinin əksəriyyətini öldürüblər və onların yerinə keçənləri də hədəfə alıblar: "Biz əslində (İranda) rejim dəyişikliyi yaşayırıq. Bu, bir rejim dəyişikliyidir, çünki onların hazırkı liderləri bütün bu problemləri yaradan əvvəlki liderlərdən çox fərqlidirlər. Düşünürəm ki, bu, bir rejim dəyişikliyidir".
Trampın İranla danışıqlarla bağlı bəzi açıqlamaları isə media nümayəndələri arasında maraq doğurub. ABŞ prezidenti İrandan bir hədiyyə aldıqlarını iddia edib: "Dünən həqiqətən gözəl bir şey etdilər. Bizə bir hədiyyə göndərdilər. Hədiyyə bu gün gəlib bizə çatdı, çox böyük və dəyərli bir hədiyyə idi. Hədiyyənin nə olduğunu deməyəcəyəm".
Tramp daha sonra hədiyyənin nüvə ilə bağlı olmadığını, "neft və təbii qazla əlaqəli bir şey" olduğunu deyib.
Səudiyyə Ərəbistanının vəliəhd şahzadəsi Məhəmməd bin Salmanın ondan İranla bağlı "daha çox iş görməsini" istəyib-istəmədiyi sualına Tramp "Bəli, o, döyüşçüdür. Səudiyyə Ərəbistanı bizimlə birlikdə vuruşur" cavabını verib.
Hörmüz boğazına gəldikdə isə, Tramp İrana böyük hərbi ziyan vurduqlarını və bölgədə istədiklərini edə biləcəklərini iddia edib. "İstədiyimiz hər şeyə biz nəzarət edəcəyik" –deyən Tramp, bu barədə ətraflı danışmayıb.
ABŞ prezidenti müharibədə qalib gəldiklərini də iddia edib.
Tahir TAĞIYEV
