Müxalifət lideri Navalnını həbsxanaya göndərən prosesin memarı və Kremlin ən sadiq tərəfdarlarından biri olan məşhur vəkil İlya Remeslo öz kursundan yayınıb Putinə meydan oxuduğuna görə ağır bədəl ödəyib.
Putini müharibə cinayətkarı elan edən və istefasını tələb edən Remeslo, bu barədə açıqlamasından dərhal sonra zorla psixiatrik xəstəxanaya yerləşdirilib.
Rusiya parlamentinin keçmiş üzvü və tanınmış bloqçu Remeslo 17 martda yaydığı açıqlamada artıq Putini dəstəkləmədiyini bildirib.
Kremlin sərhədlərini aşaraq "Putin müharibə cinayətkarı və oğru kimi ədalət mühakiməsinə cəlb olunmalıdır" deyən Remeslo açıqlamalarından bir neçə gün sonra yoxa çıxıb. İctimaiyyətlə əlaqəsi tamamilə kəsilən məşhur şəxsiyyətin Sankt-Peterburqdakı 3 nömrəli Psixiatriya Xəstəxanasında zorla saxlanıldığı ortaya çıxıb.
Remeslo əvvəllər Navalnı işlərində Kremlin ən böyük “kozırı” kimi istifadə olunub. Navalnının 2021-ci ildə Rusiyaya qayıtması ilə başlayan həbs prosesi zamanı Remeslo dövlət televiziyasında görkəmli qonaq olub. Prokurorluğa təqdim etdiyi "xüsusi sənədlər" və hazırladığı "korrupsiya təhlilləri" vasitəsilə Navalnının siyasi hərəkatını rəsmi olaraq "terror təşkilatı" kimi təsnif etməyi bacarıb. Remeslo məhkəmə zallarında ifadə verərək müxalifətin maliyyə resurslarını qurudan şəxs kimi tarixə düşüb.
2023-cü il Priqojin üsyanını dönüş nöqtəsi kimi görən Remeslo ölkədən qaçmayacağını və həbsxanaya getməyə hazır olduğunu söyləmişdi.
Təkcə Navalnı deyil, Rusiya daxilində bir çox demokratik təşkilat Remeslonun "donos məktubları" sayəsindən bağlanıb.
Remeslonun psixiatrik klinikaya köçürülməsi, dissidentlərin mühakimə olunmaq əvəzinə ruhi xəstəxanalara yerləşdirildiyi Sovet dövrünün taktikalarını xatırladır.
Remeslonun saxlanıldığı müəssisə məhkəmə-psixiatrik dəyərləndirmə adı altında müxalifləri susdurması ilə tanınır.
Tahir TAĞIYEV
