ABŞ və İsrailin 28 fevralda İrana qarşı başlatdığı hücumlar və İranın cavab tədbirləri davam edir. Müharibənin 16-cı günündə İrandan şok iddia ortaya atılıb.
İranın Ali Milli Təhlükəsizlik Şurasının katibi Əli Laricani, İranı günahlandırmaq üçün 11 sentyabr hücumlarına bənzər bir "saxta bayraq" əməliyyatının planlaşdırıldığı barədə məlumat aldıqlarını bildirib.
X sosial media hesabında paylaşılan mesajda Laricani bildirib: "Eşitdiyimə görə, Epşteyn şəbəkəsinin qalan üzvləri 11 sentyabr hadisəsinə bənzər bir hadisə törətmək və günahı İranın üstünə atmaq üçün plan hazırlayırlar. İran bu cür terror planlarına kökündən qarşıdır və Amerika xalqı ilə müharibəsi yoxdur".
11 sentyabr 2001-ci ildə ABŞ tarixinin ən böyük terror hücumlarından biri ilə sarsıldı. “Əl-Qaidə” terror təşkilatının 19 üzvü tərəfindən qaçırılan dörd sərnişin təyyarəsi ölkənin müxtəlif yerlərini hədəf alan hücumlarda istifadə edilib.
Qaçırılan təyyarələrdən ikisi Nyu-Yorkdakı Dünya Ticarət Mərkəzinin məşhur Əkiz Qüllələrinə çırpılıb. Qəzalar nəticəsində böyük yanğınlar baş verib və qısa müddət sonra hər iki bina dağılıb. Hücumlar nəticəsində minlərlə insan ölüb və ya yaralanıb.
Üçüncü təyyarə ABŞ Müdafiə Nazirliyinin qərargahı olan Pentaqona çırpılıb, dördüncü təyyarə isə sərnişinlərin müdaxiləsi səbəbindən hədəfinə çata bilməyib və Pensilvaniyada boş bir sahəyə düçüb.
Hücumlarda təxminən 3000 insan həyatını itirib. 11 sentyabr hücumları təkcə ABŞ-da deyil, həm də dünyada təhlükəsizlik siyasətində dəyişikliklərə səbəb olub. Hadisələrdən sonra ABŞ terrorizmə qarşı mübarizə çərçivəsində Əfqanıstanda hərbi əməliyyatlara başlayıb.
Qeyd edək ki, Tehran və Vaşinqton administrasiyaları arasında danışıqların davam etdiyi bir vaxtda, İsrail və ABŞ 28 fevralda İrana hərbi hücuma başlayıblar. İran isə ABŞ bazalarının yerləşdiyi İsrail, Qətər, Birləşmiş Ərəb Əmirlikləri və Bəhreyn də daxil olmaqla bir neçə regional ölkəyə cavab hücumlarına başlayıb.
ABŞ-İsrail hücumlarında İran lideri Ayətullah Əli Xamenei və çoxsaylı yüksək vəzifəli şəxslər həlak olub.
İran rəsmilərinin məlumatına görə, ABŞ-İsrail hücumlarında ölənlərin sayı 1348 nəfəri, yaralananların sayı isə 17000-i keçib. İran mediasında yer alan xəbərlərə görə, Səhiyyə Nazirliyi 28 fevral müharibəsinin başlanğıcından bəri 223 qadının, o cümlədən 3 hamilə qadının və 202 uşağın həyatını itirdiyini açıqlayıb.
Tahir TAĞIYEV
