ABŞ Prezidenti Tramp NBC News-a verdiyi müsahibədə ABŞ və İsrailin İrana hücumları barədə danışıb. "İran razılaşmaq istəyir, amma mən istəmirəm, çünki şərtlər hələ kifayət qədər yaxşı deyil", - deyə Tramp İranla potensial razılaşmanın şərtlərinin "çox möhkəm" olmalı olduğunu vurğulayıb.
Hücumlara son qoymaq üçün potensial razılaşmanın şərtlərinin nə olacağı sualını isə cavabsız qoyan Tramp, İranın nüvə ambisiyalarından tamamilə imtina etmək öhdəliyinin razılaşmanın bir hissəsi olacağını bildirib.
Neft qiymətlərinin artmasından danışan Tramp, İrana hücumlar bitdikdən sonra qiymətlərin düşəcəyini bildirib: "Orada çoxlu neft və təbii qaz var, amma bilirsiniz, hazırda bir az tıxac var. Bu tıxac tezliklə aradan qaldırılacaq."
Tramp neft qiymətlərinin ara seçkilərə təsir etməsindən narahat olmadığını da bildirib. Tramp həmçinin artan neft qiymətləri qarşısında Hörmüz boğazının təhlükəsizliyini təmin etmək üçün digər ölkələrlə bir plan üzərində işlədiklərini bildirib. O, Hörmüz boğazının təhlükəsizliyini təmin etmək üçün bir çox ölkəyə çağırış etdiyini və bir neçə ölkənin kömək etməyə razı olduğunu deyib.
Tramp İranın yeni lideri Müctəba Xamenei haqqında da danışıb: "Onun sağ və ya ölü olduğunu bilmirəm. Hələ heç kim bunu göstərə bilməyib".
Tramp daha sonra "Eşitmişəm ki, o, həyatda deyil. Əgər sağdırsa, ölkəsi üçün çox ağıllı bir addım atmalı və təslim olmalıdır" deyib.
Buna baxmayaraq, Tramp ölüm xəbərlərini yenə də "sadəcə şayiə" adlandırıb. Tramp yenə də İranın gələcəyi üçün "böyük potensial liderlər" olduğunu bildirib, lakin onların adlarını çəkərək onları təhlükəyə atmaq istəmədiyini deyib.
Tahir TAĞIYEV
