ABŞ və İsrailin İrana qarşı əməliyyata başladığı 28 fevraldan bəri Qərbi Avropada bir radio ötürücüsü sirli siqnallar ötürür.
Bu barədə "Financial Times" qəzeti məlumat yayıb. Jurnalistlərə açıqlama verən keçmiş ABŞ kəşfiyyat rəsmiləri bununla ABŞ-ın İran daxilindəki agentlərlə əlaqə saxladığı versiyasını irəli sürüb.
Siqnal fars dilində "Diqqət!" sözü ilə başlayır, ardınca rəqəmlər axını gəlir. FT şifrələnmiş mesaja nümunə olaraq "Altı. Dörd. Sıfır. Doqquz. Üç. Doqquz"u göstərib. Siqnal gündə iki dəfə ötürülür: İran vaxtı ilə səhər saat 5:30-da və axşam saat 9:30-da.
"Bu, yəqin ki, İran daxilindəki mənbələrimiz üçün ehtiyat linkdir. Bunlar əlaqəni itirməyə imkan verməyəcəyiniz insanlardır. Müharibəyə gedirsinizsə, bu, mükəmməl ehtiyat planıdır", - deyə Mərkəzi Kəşfiyyat İdarəsinin Moskva bölməsinin keçmiş rəhbəri Con Sifer bildirib.
Nəşr bildirir ki, ABŞ-ın İrandakı hərbi kampaniyasının başlamasından bir neçə gün sonra siqnal bir sıra müdaxilələr nəticəsində qısa müddətə kəsilib. FT mütəxəssislərə istinadən bildirir ki, İslam Respublikası çox güman ki, ötürmələri boğmağa çalışır. Lakin sirli səs tez bir zamanda yeni tezliyə keçib və nömrələri sadalamağa davam edir.
SAMİRƏ
