Ramil Məmmədli: “Putin bütün mümkün vasitələrlə çalışacaq ki, ABŞ İranda çıxılmaz bir vəziyyətə düşsün”
Fevralın 28-də başlayan ABŞ-İran müharibəsi artıq 11-ci gündür ki, davam edir. Müharibənin elə ilk günündən ABŞ-İsrail koalisiyasının hərbi üstünlüyü açıq şəkildə müşahidə edilsə də, İran da sistemli müqavimət ortaya qoymaqda, qarşı tərəfin hərbi arsenalına, eləcə də digər ölkələrdəki bazalarına uğurlu zərbələr endirməkdə davam edir.
İran ordusunun orta və uzaqmənzilli raket ehtiyatının, eləcə də dron sistemlərinin tam məhv edilməməsi də ABŞ ordusunun qonşu ölkəyə həmləsindəki əsas kəsirlərdən biri hesab edilə bilər. Bütün bu amillər, eləcə də ali dini liderin öldürülməsi ilə mərkəzi hakimiyyətin sarsılacağı, İran cəmiyyətində xaos və qarışıqlığın yaranacağı və s. kimi ehtimalların özünü doğrultmaması müharibə ilə bağlı sualları artırır.
Diqqəti çəkən məqam həm də müharibə başlayandan Rusiyanın sərgilədiyi mövqedir. Məsələ ondadır ki, Rusiya Trampın İran basqınları fonunda hələ də çox təmkinli davranır. Müharibə ilə bağlı demək olar konkret mövqe ortaya qoymayıb. Hesab etmək olarmı ki, ABŞ Putini Ukrayna bataqlığına saldığı kimi, Putin də Trampı İran bataqlığına soxmaq istəyir? Bəlkə elə buna görədir ki, Tramp İranda quru əməliyyatlara o qədər də həvəsli görünmür və bu o deməkdir ABŞ İranda rejim dəyişikliyi hədəfindən geri çəkilib?
Sözügedən məsələni baki-xeber.com-a şərh edən hərbi ekspert Ramil Məmmədlinin fikrincə, Rusiyanın elə məqsədi budur: “Əvvəla, çətini müharibənin başlamasıdır. Çalışmaq lazımdır ki, müharibədən yayınasan. Müharibə başlayandan sonra onun nə vaxt bitəcəyini heç kəs proqnozlaşdıra bilməz. Bu baxımdan təbii ki, Rusiyanın məqsədi Birləşmiş Ştatları Yaxın Şərqdə bataqlığa salmaqdır. Unutmaq olmaz ki, 2023-cü ilin oktyabrında Qəzzada müharibənin alovlanmasında Rusiya kəşfiyyatının rolu var idi. O vaxt ABŞ prezidenti Bayden idi. İsrailə görə ABŞ Ukraynaya silah yardımını azaltdı. Nəticədə elə həmin il Ukraynanın əks-hücum əməliyyatı uğursuzluqla başa çatdı. Rusiya 4 ildən çoxdur Ukraynada müharibə aparır, amma qarşısına qoyduğu hədəflərə çata bilmir. Putin hiyləgər və qisasçı bir dövlət başçısıdır. O, bütün mümkün vasitələrlə çalışacaq ki, ABŞ İranda çıxılmaz bir vəziyyətə düşsün. Belə olmasaydı Moskva Tehranı kəşfiyyat məlumatları ilə təmin etməzdi. Birləşmiş Ştatların İranda quru əməliyyatlarına başlayacağı real görünmür. Ona görə ki, İran İraq deyil və ərazisi çox böyükdür. O üzdən, Tramp İranda quru əməliyyatlarına başlasa bu, ABŞ üçün fəlakətli olacaq. Qazanan isə Rusiya olacaq. Bundan istifadə edib inamla Ukraynanın işğalını genişləndirəcək”.
Vidadi ORDAHALLI
