ABŞ prezidenti Donald Tramp bildirib ki, Hörmüz boğazından neft axını dayandırılarsa, İrana "20 dəfə daha sərt" cavab veriləcək. O, həmçinin müharibənin nə vaxt bitəcəyinə İsraillə birlikdə qərar verəcəklərini də bildirib.
Trampın sözlərindən sonra İran İnqilab Keşikçiləri Korpusu (SEPAH) açıqlama yayaraq, ABŞ və İsraillə münaqişə davam etdiyi müddətcə Körfəzdən neft ixracına icazə verməyəcəyini bildirib. Tehran rejiminə bağlı qüvvələr bölgədəki nəzarətin onların əlində olduğunu vurğulayıblar.
"İran silahlı qüvvələri növbəti xəbərdarlığa qədər bölgədən düşmən tərəfə və tərəfdaşlarına bir litr də olsun neft ixracına icazə verməyəcək" – deyə İnqilab Keşikçilərinin açıqlamasında bildirilir.
Açıqlamada Trampın müharibənin demək olar ki, bitdiyinə dair iddiaları da hədəfə alınıb. İnqilab Keşikçiləri bildirib ki, "Müharibənin sonunu biz müəyyən edəcəyik. Regionun və gələcək vəziyyətin taleyi artıq silahlı qüvvələrimizin əlindədir. ABŞ qüvvələri müharibəyə son qoya bilməyəcək".
Tahir TAĞIYEV
