Ümumdünya Səhiyyə Təşkilatı (ÜST) İsrailin Livana hücumlarında fosforlu sursatlardan istifadə etməsi barədə məlumatlar alıb və vəziyyəti araşdırmağa davam edəcək.
Xarici medianın yaydığı məlumata görə, bunu ÜST-ün Livandakı nümayəndəsi Abdinasir Abubakar Cenevrədə keçirilən brifinqdə bildirib. "Biz bu məlumatları almışıq. Xəstəxanalarla əlaqə saxlamışıq. Hazırda keçmişdə fosfor və ya digər kimyəvi maddələrin istifadəsi ilə bağlı hər hansı bir xəsarət barədə məlumat almamışıq. Biz belə şəxsləri müəyyən etmək üçün vəziyyəti araşdırırıq və izləyirik”. Martın 6-da Livan Silahlı Qüvvələrindəki mənbə RİA Novosti agentliyinə bildirib ki, İsrail Hərbi Hava Qüvvələri Livanın cənubundakı yaşayış məntəqələrinə endirilən zərbələrdə fosfor tərkibli mərmilərdən istifadə edib. Martın 9-da Human Rights Watch təşkilatı İsrail ordusunun Livanın cənubunda fosfor mərmilərindən istifadə etdiyini təsdiqlədiyini bildirib. ABŞ və İsrailin İrana qarşı hərbi əməliyyatlarının başlamasından sonra Livan Hizbullah hərəkatı İsrailə hücum etməyə başlayıb və İsrail də öz növbəsində Livanda cavab hərbi əməliyyatlarına başlayıb. İsrailin ölkədəki zərbələri nəticəsində ölənlərin sayı təxminən 400 nəfərə çatıb.
İradə SARIYEVA
