Prezident Donald Tramp ABŞ və İsrailin İrana 28 fevralda başlayan hücumları ilə bağlı yeni diqqətçəkən açıqlama verib.
Tramp İranla danışıqlara gedə biləcəyini bildirib. Fox News-a danışan ABŞ lideri "İran danışmaq istəyir. Danışıq şəraitdən asılı olaraq mümkündür. Artıq danışmağa ehtiyacımız yoxdur. Amma bu mümkündür" deyib.
İranın yeni dini lideri Müctəba Xamenei haqqında da danışan Tramp qərardan narazılığını ifadə edib: "Onun sülh içində yaşaya biləcəyinə inanmıram".
Tramp İranın danışmaq istədiyini desə də, Tehrandan fərqli siqnallar gəlir. Trampın "İranla danışa bilərik" açıqlamasından əvvəl İranın xarici işlər naziri Abbas Əraqçi deyib ki, acı təcrübələrdən sonra ABŞ ilə danışıqlar olmayacaq. Əraqçi ABŞ-la müzakirə və ya danışıqların artıq gündəmdə olmadığını bildirib.
Arakçi dedi: "Bizə hücum etmək niyyətində olmadıqlarını və İranın nüvə məsələsini sülh yolu ilə danışıqlarla həll etmək istədiklərini dedilər. Amma yenə də bizə hücum etdilər. Amerikalılarla danışmaq məsələsinin yenidən gündəmə gələcəyini düşünmürəm".
Bu arada, ABŞ prezidenti Tramp və Rusiya prezidenti Putin arasında dünənki telefon danışığından sonra Kremldən vasitəçilik təklifi gəlib. Kremlin sözçüsü Dmitri Peskov xatırladıb ki, Putin əvvəllər Yaxın Şərqdə gərginliyi azaltmaq üçün vasitəçilik variantları təklif edib: "Bu təkliflərin çoxu masadadır. Putin dünənki görüşdə bunlardan bəhs edib. Rusiya bu baxımdan əlindən gələni etməyə hazırdır, lakin bu məsələdə çoxşaxəli anlaşmaya ehtiyac var".
Təkliflər haqqında ətraflı məlumat verməkdən imtina edən Peskov, Rusiyanın İrana kəşfiyyat məlumatı verməsi iddialarını isə cavabsız qoyub.
TAHİR
