Son vaxtlar gərginliyin yaşandığı Macarıstan-Ukrayna xəttində gərginliyi daha da artıracaq bir hadisə baş erib. Macarıstan hökuməti milyonlarla avro nağd pul və qızıl külçələr daşıyan iki Ukrayna zirehli bank maşınını saxlayıb.
Macarıstan və Ukrayna arasında getdikcə gərginləşən vəziyyət Budapeştdəki bu əməliyyatla daha da artıb. Macarıstan hakimiyyəti həmçinin bank maşınını müşayiət edən yeddi Ukrayna vətəndaşını da saxlayıb. Macarıstan hakimiyyəti saxlanılanların kəşfiyyat əlaqələri ola biləcəyini və pulun mənbəyinin şübhəli olduğunu iddia edib.
Ukrayna xarici işlər naziri Andrey Sibiqa Macarıstanı "girov götürməkdə və pul oğurluğunda" günahlandıraraq Budapeşt hökumətini sərt tənqid edib. Sibiqa həmçinin Macarıstanda gələn ay keçiriləcək seçkilərdən əvvəl siyasi qazanc əldə etmək məqsədilə gündəmə gətirildiyini deyərək, Rusiyayönlü siyasəti ilə tanınan Macarıstan Baş naziri Viktor Orbanı tənqid edib.
Macarıstan Milli Vergi və Gömrük Administrasiyası isə yüklə bağlı çirkli pulların yuyulması ittihamı ilə araşdırma başlatdığını açıqlayıb. Hakimiyyət orqanları nəqliyyat vasitələrində 40 milyon dollar, 35 milyon avro nağd pul və 9 kiloqram qızıl tapıldığını bildirir. Saxlananlardan biriniin "keçmiş Ukrayna kəşfiyyat generalı" olduğu qeyd edilir.
Ukraynanın dövlət əmanət bankı olan “Oschadbank” isə iddiaları təkzib edir. Bank, Ukraynada hava məkanı məhdudiyyətləri səbəbindən nağd pul və qızıl köçürmələri avtomobil yolu ilə həyata keçirildiyini, sözügedən yükün də Avstriya ilə Ukrayna arasında adi daşınma olduğu bildirilir.
Macarıstan Baş naziri Orbanın siyasi direktoru Balaj Orban isə göndərişə şübhə ilə yanaşdıqlarını bildirib. "Macarıstan vasitəsilə zirehli texnikalarda nağd pul və qızılın daşınması qanuni maliyyə əməliyyatlarının adətən necə aparıldığının əlaməti deyil. Əsl sual sadədir: Bu pulun arxasında kim dayanır və nəyi maliyyələşdirmək nəzərdə tutulur?" - deyə Balaj Orban bildirib
Tahir TAĞIYEV
