Əli Mustafa: “Tramp Avropanın Ukrayna ilə bağlı danışıqlara qoşulmasına razılıq verməyəcək”
ABŞ Prezidenti Donald Tramp Ağ Evdə Almaniya kansleri Fridrix Mertzlə görüşüb. Mertz görüşdə deyib ki, Vaşinqton Rusiya prezidenti Vladimir Putini sülh danışıqlarında güzəştə getməyə məcbur etmək üçün Moskvaya təzyiqi artırmalıdır:
“Rusiya vaxt baxımından gecikir. Və bunu etməklə Amerika prezidentinin iradəsinə zidd hərəkət edir. Bugünkü danışıqlarda mən Moskvaya təzyiqi artırmağa çağırdım”.
Bununla yanaşı Almaniya kansleri onu da qeyd edib ki, Ukrayna ilə bağlı danışıqlara Avropanın da qoşulmasının vacibliyi ilə bağlı Trampı inandırmağa çalışıb: “Avropa ABŞ-ın vasitəçiliyi ilə Rusiya və Ukrayna arasında sülh danışıqlarına qoşulmalıdır. Prezident Tramp bilir: yalnız Avropanın dəstəkləməyə və tanımağa hazır olduğu sülh uzunmüddətli olacaq”.
Maraqlıdır, Almaniya kansleri ABŞ prezidentini inandıra biləcəkmi? Tramp bunu qəbul edəcəkmi Avropa təmsilçiləri Ukrayna ilə bağlı Rusiya-ABŞ danışıqlarına qoşulsun? Tramp Avropanı bu danışıqlar formatına buraxacaqmı? Bu, nə dərəcədə realdır?
Sözügedən məsələni baki-xeber.com-a şərh edən siyasi ekspert Əli Mustafa hesab edir ki, Trampın Avropanı danışıqlar prosesinə buraxması real görünmür: “Bunun bir neçə səbəbi var. Bir səbəbi onunla əlaqədardır ki, Tramp müharibəni tez bitirmək istəyir. Özü də bunu Ukraynanın birtərəfli güzəştləri hesabına təmin etmək istəyir. Yəni istəyir ki, yalnız Ukrayna güzəşt etsin. Çünki Tramp üçün Ukraynanın ərazilər itirməsinin heç bir əhəmiyyəti yoxdur. Təki müharibə dayansın. Avropa isə qəti olaraq buna qarşıdır. Avropa Ukrayna məsələsinin beynəlxalq hüquqa dayanaraq həllini istəyir. Digər tərəfdən Tramp Rusiya-Ukrayna müharibəsini bitirməklə bunu öz adına yazdırmaq istəyir. Buna görə Nobel mükafatı almaq istəyir. Hesab edir ki, Avropa danışıqlara ortaq olsa, bunu öz adı ilə bağlaya bilməz. Eyni zamanda hesab edir ki, Avropa danışıqlara qoşulsa Rusiya ümumiyyətlə radikal mövqe sərgiləyəcək. Ən nəhayət, Rusiyanın da Avropanın danışıqlara qoşulmasına razılıq verəcəyi real görünmür. Ən azından Moskva Avropanın Ukrayna məsələsində hansı mövqedə olduğunu bildiyi üçün buna getməz. Kreml hesab edir ki, Avropa danışıqlara qoşulsa, balans Rusiyanın əleyhinə dəyişəcək. Məsələnin həm də bu tərəfi var. Bütün bunlardan çıxış edərək hesab edirəm ki, Tramp Avropanın Ukrayna ilə bağlı danışıqlara qoşulmasına razılıq verməyəcək”.
Vidadi ORDAHALLI
