Ramil Məmmədli: “İranın müəyyən raket arsenalı var və onlar yeraltı tunellərdə saxlanılır”
İranın İsrailə raket zərbələrinin gücləndiyi kimi bir görüntü var. Ərəb televiziyasının məlumatına görə, martın 6-da İran Təl-Əviv, Qüds və digər bölgələrə təxminən 10 raket atıb. Hadisənin təfərrüatları və nəticələri barədə hələ rəsmi açıqlama verilməyib.
Yayılan digər məlumata görə, İranın nəhəng atəş gücü son bir neçə gündə nümayiş etdirilib. Çin ABŞ-İsrail zərbələrindən bir qədər əvvəl İrana silah çatdırıb. İranın raketlərinin əksəriyyəti Çin dizaynlarından törəmədir, pilotsuz uçuş aparatları isə ikili təyinatlı Çin komponentlərinin tədarükündən ciddi şəkildə asılıdır. İran sursatları təkcə İsrail və ABŞ obyektlərini deyil, həm də BƏƏ, Oman, Bəhreyn, Səudiyyə Ərəbistanı daxil olmaqla ən azı 11 digər ölkədə hədəfləri vurub. İran ordusunun əsas komanda-idarəetmə mərkəzinin məhv edildiyi görünür, lakin köməkçi bölmələr hədəfləri vurmağa davam edir.
Maraqlıdır, ola bilərmi ki, artıq Rusiya və Çinin, ya başqa hansısa ölkənin verdiyi silahlar dövriyyəyə girir?
Sözügedən məsələni baki-xeber.com-a şərh edən hərbi ekspert Ramil Məmmədlinin fikrincə, bu barədə birmənalı fikir bildirmək çətindir: “Burada müxtəlif versiyalar var. Əvvəla, İranın müəyyən raket arsenalı var. Həmin raketlər əsasən yeraltı tunellərdə saxlanılır. Bir ara raket zərbələrinin intensivliyi azaldı. Belə fikirlər yayıldı ki, İranın raket ehtiyatları tükənir. Fikrimcə, bu, İran tərəfindən bir aldadıcı gediş də ola bilər. Ola bilsin həmin raketləri qorumaq üçün belə ediblər. Belə məlumatlar var ki, ABŞ hava qüvvələri son günlər İranın bir neçə raket buraxılış sistemlərini sıradan çıxarıblar. Konkret Rusiya və Çinin yardımlarına gəldikdə isə, burada bir neçə məqam var. Birincisi, Rusiya 4 ildir Ukraynada intensiv müharibə apardığı üçün silah arsenalının böyük hissəsini işlədib. Belə olmasaydı Şimali Koreyadan sursat almazdılar. Nəzərə almaq lazımdır ki, raketlər mürəkkəb texnoloji konstruksiyaya malik olduğu üçün onları hazırlamaq elə də asan olmur. O baxımdan Rusiyanın İrana raket tədarük etməsi real görünmür. Çünki özünün bu silahlara böyük ehtiyacı var. Çinə gəldikdə isə, onsuz da ABŞ-ın İrana zərbə endirəcəyi bəlli idi. Çünki körfəzə böyük hərbi arsenal toplayırdı. Çin həmin müddət ərzində İrana silah vermək istəsəydi, bunu edərdi. Hesab edirəm ki, Çin ABŞ-la böyük həcmdə ticarət əlaqələrinə malik olduğu üçün bunu zərbə altında qoymaq istəmir. O baxımdan məhz son günlər Çinin İrana bir sıra raketlər verdiyi haqda məlumatlar o qədər də inandırıcı görünmür”.
Vidadi ORDAHALLI
