Şri-Lanka sahillərində sualtı qayıqla bir İran gəmisi vurulub. Gəmi vurulduqdan sonra təcili yardım siqnalı göndərib. Şri-Lanka hakimiyyəti hadisənin onların ərazi sularında baş verdiyini bildirib və heyət üzvlərinin təxliyəsi üçün genişmiqyaslı əməliyyatın başlandığını açıqlayıb.
Təxminən 180 nəfərin olduğu gəmidən 30 heyət üzvü xilas edilərək xəstəxanaya aparılıb, itkin düşənlərlə bağlı əməliyyat axtarış tədbirləri başlayıb.
Şri-Lanka Hərbi Dəniz Qüvvələri və Müdafiə Nazirliyinin mənbələrinə görə, Şri-Lanka sahillərində İran gəmisinə sualtı qayıq hücumu nəticəsində ən azı 101 nəfər itkin düşüb, 78 nəfər yaralanıb. Hərbi Dəniz Qüvvələrinin açıqlamasında İran hərbi gəmisinin ölkə sahillərində Hind okeanında batdığı təsdiqlənib.
Hadisədən qısa müddət sonra açıqlama verən ABŞ-ın müdafiə katibi Pit Heqset bildirib ki, ABŞ-a məxsus sualtı qayıq beynəlxalq sularda İran hərbi gəmisini torpedo ilə batırıb.
O, bunun İkinci Dünya müharibəsindən sonra düşmənə edilən ilk belə hücum olduğunu söyləyib.
Xatırladaq ki, İsrail və ABŞ Tehran və Vaşinqton arasında danışıqların davam etdiyi bir vaxtda 28 fevralda İrana hücuma başlayıblar. İran İsrail, Qətər (ABŞ bazalarının yerləşdiyi ölkələr), Birləşmiş Ərəb Əmirlikləri (BƏƏ) və Bəhreyn də daxil olmaqla bir neçə regional ölkədə hədəflərə hücumlarla cavab verib.
ABŞ-İsrail hücumlarında İran lideri Əli Xamenei və çoxsaylı yüksək vəzifəli məmurlar öldürülüb.
İran Qırmızı Ayparası ABŞ-İsrail hücumlarında 787 nəfərin həyatını itirdiyini açıqlayıb.
Tahir TAĞIYEV
