Azər Həsrət: "NATO buraxılsa belə, bu, heç nəyi dəyişmir - yenə də ABŞ dünyanın bir nömrəli qlobal gücüdür"
İspaniya hökuməti ABŞ və İsrailin İrana qarşı başladığı hərbi əməliyyatlara dəstək verməkdən imtina edib və ölkə ərazisindəki bazaların bu məqsədlə istifadəsinə icazə verməyib.
Xarici işlər naziri Xose Manuel Albares bildirib ki, Rota hərbi bazası və Moron aviabazası BMT Nizamnaməsinə və ikitərəfli razılaşmalara uyğun olmayan əməliyyatlar üçün istifadə olunmayacaq. İspaniya İrana edilən hücumları da pisləyib.
FlightRadar24 məlumatına görə, qərardan sonra İspaniyanın cənubundakı bazalardan ABŞ-a məxsus 15 hərbi təyyarə havalanaraq ölkəni tərk edib. Onların əksəriyyəti “KC-135 Stratotanker” tipli yanacaqdoldurma təyyarələri olub. Təyyarələrin ən azı 7-si Ramştein aviabazasına eniş edib, digərləri isə Fransa istiqamətinə yollanıb.
Tramp cavab olaraq İspaniyanı hədələyib ki, onlara ticarət məhdudiyyətləri tətbiq edəcək.
Digər NATO üzvlərindən bir neçəsi də belə qərar versə, NATO-nun aqibəti necə olacaq?
Məsələ ilə bağlı “Bakı-Xəbər” nəşrinə danışan siyasi şərhçi Azər Həsrət bildirib ki, İspaniyanın bu addımı digər NATO ölkələri tərəfindən də təkrarlanarsa, bu, heç nəyi dəyişməyəcək:
“ABŞ və İsrailin hazırda nə İspaniyaya, nə də başqa bir ölkəyə ehtiyacı yoxdur. Onlar özlərinə gərəkən qədər arsenalı İranın sərhədləri yaxınlığına gətirib yerləşdiriblər və mərhələlərlə ondan istifadə edirlər. Yəni hansısa NATO üzvünün belə bir qərar qəbul etməsi heç nəyi dəyişməyəcək.
Arada İspaniya özü itirəcək, çünki Tramp əlavə ticarət tarifi tətbiq edəcəyinə dair vədinə mütləq əməl edəcək.
Ümumiyyətlə, NATO-nun aqibətinə gəlincə, Donald Tramp prezidentliyə başlayandan bəri, necə deyərlər, NATO-nu da, Avropa Birliyini də gözüçıxdıya salıb, hətta BMT-ni şübhə altına alıb. Yəni dünya yenidən şəkilləndirilir. Mümkündür ki, indiki şəraitdə hətta NATO-nu da başqa bir struktur əvəzləsin. Sülh Şurası qurulub, o şurada Donald Tramp sədrlik edir. Azərbaycan da daxil olmaqla Türk Dövlətləri Təşkilatının beş üzvü bu şuranın sıralarında özünə yer alıb.
Başqa sözlə desək, dünyanın başqa bir aspektdən düzənlənməsi gedir. Ona görə də NATO-nun aqibətinin necə olacağı o qədər də narahatedici amil deyil. Üstəlik, ABŞ belə əməliyyatlar aparanda heç vaxt NATO-ya və NATO üzvü olan digər ölkələrə ümid etməyib. Ona görə də ABŞ-ın narahatlığına heç bir əsas yoxdur. NATO buraxılsa belə, bu, heç nəyi dəyişmir - yenə də ABŞ dünyanın bir nömrəli qlobal gücüdür. Bu liderlik çox güman ki, uzun illər davam edəcək. Gələcəkdə nələrin baş verəcəyi barədə düşünmək isə hələ tezdir.”
Akif NƏSİRLİ
