İran dövlət mediası ABŞ və İsrailin hücumları nəticəsində Ali Lideri Ayətullah Əli Xameneyinin öldürüldüyünü açıqlayıb. Dini liderin səhər saatlarında iqamətgahında öldürldüyü bildirilir. Ölkədə 40 günlük matəm elan edilib.
ABŞ və İsraildən bu barədə açıqlamalar var idi, ancaq ölkə rəhbərliyi bu iddiaları təkzib edirdi. İran dövlət televiziyasının son açıqlaması ilə Xameneyinin öldürüldüyünü təsdiqlədi.
Bundan bir neçə saat əvvəl Tramp özünün “Truth Social” platformasında yazılı açıqlamasında Xameneyinin öldüyünü açıqlamışdı: "O, bizim kəşfiyyat və yüksək səviyyəli müşahidə sistemlərimizdən qaça bilmədi və İsraillə sıx əməkdaşlıq etdiyimiz üçün nə o, nə də onunla birlikdə öldürülən digər liderlər heç nə edə bilməzdilər".
İsrail Baş naziri Benyamin Netanyahu da axşam saatlarında Xameneyinin öldüyünə dair əlamətlərin olduğunu bildirmişdi.
Xameneyinin yerinə kimin gətiriləcəyi, bundan sonra İranın hansı addımları atacağı maraq doğurur…
Xameneyi kimdir?
Əli Xamenei 19 aprel 1939-cu ildə İranın Məşhəd şəhərində anadan olub. O, gənc yaşlarında dini təhsil almağa başlayıb və şiə ruhanisi olub. 1979-cu il İran İslam İnqilabı zamanı inqilabi hərəkata qatılıb. İnqilabdan sonra o, dövlət vəzifələrində sürətlə yüksəlib və 1981-ci ildə İran prezidenti seçilib. O, bu vəzifəni 1989-cu ilə qədər iki müddət tutub.
1989-cu ildə inqilabın lideri Ayətullah Xomeyninin vəfatından sonra Əli Xameneyi İranın ikinci Ali Lideri olub. Bu vəzifə İran dövlətində ən yüksək səlahiyyətli orqan hesab olunur. Ali Rəhbər silahlı qüvvələrin baş komandanıdır və məhkəmə sistemindən təhlükəsizlik qurumlarına qədər bir çox sahələrdə həlledici təsirə malikdir.
Əli Xameneyinin rəhbərliyi dövründə İranın siyasi strukturu daha mərkəzləşib. Ölkənin daxili siyasəti, xarici əlaqələri və təhlükəsizlik strategiyaları əsasən Ali Rəhbərin müəyyən etdiyi çərçivəyə uyğun olaraq formalaşır.
TAHİR
