Yaxın Şərqdə gərginlik görünməmiş səviyyəyə yüksəlib. ABŞ və İsrailin İrana qarşı başlatdığı tammiqyaslı hava əməliyyatı Tehranda strateji nöqtələri və yüksək vəzifəli dövlət adamlarını hədəfə alıb.
Əməliyyat təkcə hərbi məntəqələri deyil, həm də İranın ali hakimiyyətini təmsil edən Kəşfiyyat Nazirliyi və Ali Lider Əli Xameneinin ofisi kimi vacib qurumları da hədəfə alıb. Airbus Xameneyinin iqamətgahının bombardmandan sonra peyk görüntülərini yayıb. Qara tüstünün yüksəldiyi iqamətgahın tam dağıldığı görünür.
ABŞ mətbuatı yazır ki, Təl-Əviv İran liderlərini hədəf alan geniş sui-qəsd siyahısı hazırlayıb. Əməliyyatın hədəfləri bunlardır:
Əli Xameneyi: İranın dini lideri. Məsud Pezeşkian: İran prezidenti. Seyid Əbdül Rəhim Musəvi: Silahlı Qüvvələrin Baş Qərargah rəisi. Əli Şamxani: Müdafiə Şurasının katibi. Əli Laricani: Milli Təhlükəsizlik Şurasının katibi.
Prezident Məsud Pezeşkianın oğlu atasının hücum zamanı birbaşa hədəfə alındığını, lakin sui-qəsd cəhdindən sağ-salamat xilas olduğunu açıqlayıb.
Qərb mediasında, daha əvvəl də hədəf alınan Əli Şamxaninin öldürüldüyü xəbərləri yayılıb. Ancaq bu xəbər hələlik rəsmi təsdiqlənməyib.
Qeyd edək ki, İsrail və ABŞ səhər saatlarında İrana birgə hücumlar başlayıblar. İsrail Müdafiə Nazirliyi İsrailin İrana qarşı "qabaqlayıcı hücum" başlatdığını açıqlayıb. ABŞ prezidenti Donald Tramp da İrana qarşı "böyük əməliyyat" başlatdıqlarını elan edib.
Hücumlarda paytaxt Tehran, İsfahan, Kərəc, Qum, Təbriz, Buşəhr, Kermanşah və İlam şəhərləri hədəf alınıb.
İsrail və İran hava məkanlarını bağlayıb, İsraildə fövqəladə vəziyyət elan edilib və tez-tez həyəcan siqnalı səsi eşidilir. İranın əks-hücumlarından əvvəl İsrail vətəndaşlarını sığınacaqlara yönləndirmək üçün xəbərdarlıqlar edir.
İran ordusu ABŞ və İsrailin hücumlarına cavab olaraq İsrailə qarşı onlarla ballistik raket və dronla əks-hücumlar başlatdığını açıqlayıb.
İran eyni zamanda Şimali İraq, Bəhreyn, Birləşmiş Ərəb Əmirlikləri, Küveyt, Qətər və İordaniya kimi ölkələrdəki ABŞ bazalarını raket hücumları ilə hədəfə alıb və Bəhreyndəki ABŞ dəniz bazasına da zərbələr endirilib.
TAHİR
