İsrail və ABŞ İrana qarşı koordinasiyalı əməliyyat keçirir. Paytaxt Tehranın və ölkənin digər böyük şəhərlərində çoxsaylı partlayış səsləri eşidilir.
İranın Tasnim xəbər agentliyinin məlumatına görə, hücumlar zamanı prezident sarayı və Ali Rəhbər Ayətullah Xameneinin iqamətgahının yaxınlığında yeddi raket atılıb.
İran Səhiyyə Nazirliyi xəstəxanaların hazır vəziyyətdə olduğunu və yaralıların sayının təsdiqləndikdən sonra açıqlanacağını açıqlayıb.
Bu arada, İran prezidenti Məsud Pezeşkianın oğlu atasının ABŞ-İsrail hücumlarında hədəfə alındığını, lakin sui-qəsd cəhdindən sağ çıxdığını açıqlayıb.
Ölkə mediasında yer alan xəbərlərə görə, prezident Pezaşkianın oğlu Yusif Pezeşkian atasının səhhətinin yaxşı olduğunu bildirib.
Yusuf atası Pezeşkianın ABŞ-İsrail hücumlarının hədəfində olduğunu təsdiqləyib: "Sui-qəsd cəhdləri uğursuz oldu və digər rəsmilər də sağdırlar. Çox güman ki, daha uzun bir münaqişə yaşayacağıq və bu, zəiflətmə müharibəsi olacaq. Buna görə də, bu günləri yaşamaq üçün qətiyyət və səbir lazımdır".
Qeyd edək ki, İsrail və ABŞ səhər saatlarında İrana birgə hücumlar başlayıblar. İsrail Müdafiə Nazirliyi İsrailin İrana qarşı "qabaqlayıcı hücum" başlatdığını açıqlayıb. ABŞ prezidenti Donald Tramp da İrana qarşı "böyük əməliyyat" başlatdıqlarını elan edib.
Hücumlarda paytaxt Tehran, İsfahan, Kərəc, Qum, Təbriz, Buşəhr, Kermanşah və İlam şəhərləri hədəf alınıb.
İsrail və İran hava məkanlarını bağlayıb, İsraildə fövqəladə vəziyyət elan edilib və tez-tez həyəcan siqnalı səsi eşidilir. İranın əks-hücumlarından əvvəl İsrail vətəndaşlarını sığınacaqlara yönləndirmək üçün xəbərdarlıqlar edir.
İran ordusu ABŞ və İsrailin hücumlarına cavab olaraq İsrailə qarşı onlarla ballistik raket və dronla əks-hücumlar başlatdığını açıqlayıb.
İran eyni zamanda Şimali İraq, Bəhreyn, Birləşmiş Ərəb Əmirlikləri, Küveyt, Qətər və İordaniya kimi ölkələrdəki ABŞ bazalarını raket hücumları ilə hədəfə alıb və Bəhreyndəki ABŞ dəniz bazasına da zərbələr endirilib.
TAHİR
