Əli Orucov: "Qrenlandiyalıların həqiqətən ABŞ-ın hospital gəmisinin tibbi xidmətlərinə ehtiyacı yoxdur"
Donald Tramp Qrenlandiya sahillərinə “yolda olan” hospital gəmisinin göndəriləcəyini açıqlasa da, Qrenlandiyanın baş naziri Yens-Frederik Nielsen bu təşəbbüsü rədd edib. O bildirib ki, Qrenlandiyada vətəndaşlar üçün pulsuz dövlət səhiyyə sistemi mövcuddur və ABŞ-ın hospital gəmisinə ehtiyac yoxdur. Nielsen əlavə edib ki, ölkəsi ABŞ daxil olmaqla hər kəslə dialoqa açıqdır, lakin belə məsələlər sosial şəbəkələrdə təsadüfi açıqlamalarla deyil, rəsmi danışıqlarla müzakirə edilməlidir.
Tramp isə Qrenlandiyada lazımi tibbi yardım ala bilməyən çoxlu xəstə olduğunu iddia edib və təşəbbüsü Luiziana ştatının qubernatoru ilə birlikdə irəli sürdüyünü deyib. Onun paylaşımında ABŞ-ın adətən Cənubi Kaliforniyada yerləşən USNS Mercy hospital gəmisi təsvir olunub, lakin gəminin həqiqətən Qrenlandiyaya yollanıb-yollanmadığı bəlli deyil.
Tramp ikinci prezidentlik müddətinin əvvəlindən Qrenlandiyanın ABŞ-ın nəzarətinə keçməli olduğunu dəfələrlə bəyan edib. Danimarka və digər Avropa rəsmiləri isə Qrenlandiyanın Danimarkanın muxtar ərazisi olduğunu və NATO çərçivəsində qorunduğunu xatırladıblar. ABŞ-ın adada hərbi mövcudluğu 1951-ci il sazişi ilə tənzimlənir.
Tramp bu paylaşımi və "təşəbbüsu" ilə nə etmək istəyir? Hospital-gəminin Qrellandiyaya göndərilməsi Amerikaya nə qazandıra bilə, Tramp bununla nə əldə edə bilər, məqsəd nədir?
Politoloq Əli Orucov "Bakı-Xəbər" nəşrinə açıqlamasında bildirdi ki, Danimarka dünyanın ən inkişaf etmiş ölkələrindən biri kimi beynəlxalq təşkilatların illik hesabatlarında yüksək və təhlükəsiz yaşayış səviyyəsinə görə açıqlanan hesabatlarda həmişə ön sıralarda yer alır - Danimarka sosial dövlətdir və səhiyyə, təhsil kimi vacib sahələr pulsuzdur. Ekspertin fikrincə Qrenlandiya da Danimarkanın ayrılmaz tərkib hissəsi olaraq eyni imkanlardan istifadə edir: "Yüksək yaşayış səviyyəsinə görə ABŞ Danimarkadan və onun bir parçası olan Qrenlandiyadan geri qalır. D.Trampın Qrenlandiyada lazımı tibbi yardım ala bilməyən çoxlu xəstənin olması barədə dedikləri də həqiqəti əks etdirmir. Bu fikirlər təbliğat müharibəsinin tərkib hissəsi sayılmalıdır. Fikrimizcə, qrenlandiyalıların həqiqətən ABŞ-ın hospital gəmisinin tibbi xidmətlərinə ehtiyacı yoxdur. Görünür, D.Tramp müxtəlif üsul və vasitələrlə Qrenlandiyanın ilhaqı məsələsini gündəmdə saxlamaqla, fikirlərində ciddi və israrlı olduğunu nümayiş etdirmək istəyir. Bu təbliğat müharibəsi isə ABŞ və Qərb müttəfiqlərini bir-birindən daha da uzaqlaşdırır".
Akif NƏSİRLİ
