Dünya ABŞ-ın İrana potensial hücumu ilə bağlı həyəcan içindədir. "The New York Times" qəzetinin məlumatına görə, İranın Ali Lideri Ayətullah Xameneyi, ABŞ və ya İsrailin mümkün hücumunda öldüyü təqdirdə hakimiyyətin necə işləyəcəyi barədə yüksək vəzifəli köməkçilərinə təlimatlar verib. O, səlahiyyətlərini ən etibarlı tərəfdaşlarına həvalə edəcək.
Qəzetə danışan yüksək vəzifəli İran rəsmilərinin sözlərinə görə, Xameneyi sui-qəsdə uğrayacağı halda varis planı hazırlayıb. Qeyd edilir ki, Xameneyi tərəfindən təyin edilən hər bir hərbi və mülki vəzifə üçün dörd pilləli varislik siyahısı hazırlanıb. O, əlaqənin kəsilməsi və ya sui-qəsdə məruz qalacağı halda qərar qəbuletmə səlahiyyətlərini öz yaxın ətrafına həvalə edib.
İddia edilir ki, Xameneyinin ötən ay ölkə miqyasında keçirilən etirazlar zamanı
onun sadiq köməkçisi olan Ali Milli Təhlükəsizlik Şurasının baş katibi Əli Laricanini mərkəzi liderlik roluna yüksəldərək faktiki olaraq onu dövlət işlərinə rəhbər təyin edib.
"New York Times" qəzetinin məlumatına görə, Əli Laricaninin səlahiyyətləri son aylarda genişləndirilib.
ABŞ qəzeti Laricaninin etirazların yatırılması və Vaşinqtonla həssas nüvə diplomatiyası prosesini idarə etdiyini, Rusiya, Qətər və Oman da daxil olmaqla müttəfiqlərlə koordinasiyalı iş apardığını bildirib. Həmçinin, Laricaninin ABŞ hücumlarına qarşı potensial müharibə planlamasına rəhbərlik etdiyi bildirilir.
O da qeyd edilir ki, ötən il İsraillə 12 günlük müharibə zamanı gizlənən Xameneyi üç potensial varisini müəyyən edib, lakin onların adları açıqlanmır. Laricani namizədlər arasında deyil, lakin onun Xameneyinin ən etibarlı siyasi fiqurlarından biri olduğu bildirilir. İddialara görə, ölkəni faktiki idarə edən Laricani üzündən prezident Məsud Pezeşkian da kənarda qalıb.
Xameneyinin əsas komandası arasında onun yüksək vəzifəli hərbi müşaviri və keçmiş İnqilab Keşikçiləri Komandanı, general-mayor Yəhya Rəhim Səfəvi də var. Müharibə vəziyyətində silahlı qüvvələrin komandanlığını öz üzərinə götürəcək şəxs hesab edilən keçmiş Qvardiya Komandanı və hazırkı Parlament sədri, briqada generalı Məhəmməd Baqer Qalibaf da komandanın tərkibində yer alır.
Bundan başqa, İran silahlı qüvvələri yüksək hazırlıq vəziyyətinə gətirilib, İraq və Fars körfəzi ətrafında raketlər yerləşdirib və mümkün münaqişəyə hazırlıq məqsədilə hərbi təlimlər keçirib.
TAHİR
