Böyük Britaniya Kralı III Çarlzın qardaşı, keçmiş şahzadə Endryu Mauntbetten Vindzor saxlanılıb. BBC-nin yaydığı məlumata görə, Endryu dövlət vəzifəsində sui-istifadə şübhəsi ilə həbs olunub. Onu hansı polis qurumunun saxladığı hələlik açıqlanmayıb. Lakin bu səhər Norfolkda, onun yaşadığı Sandrinqham House iqamətgahında nişansız polis avtomobillərinin göründüyü bildirilir.
Bu, keçmiş şahzadənin ilk dəfə rəsmi şəkildə saxlanılmasıdır. Britaniya kral ailəsinin üzvü Endryu Mauntbetten Vindsor pedofil Cefri Epşteynlə əlaqələri ilə bağlı qalmaqaldan sonra qalan kral titullarından da rəsmi şəkildə məhrum edilib. Endryu indiyədək bütün ittihamları qəti və ardıcıl şəkildə rədd edib.
Saxlanılma dövlət vəzifəsində mümkün qanunsuz hərəkətlərlə bağlı aparılan araşdırma çərçivəsində həyata keçirilib. Hadisə ilə bağlı əlavə təfərrüatlar hələlik açıqlanmayıb.
Böyük Britaniyanın “Thames Valley Police” qurumu dövlət vəzifəsində mümkün sui-istifadə şübhəsi ilə saxlanılan Kral III Çarlzın qardaşı, keçmiş şahzadə Endryu Mauntbetten Vindzorla bağlı rəsmi bəyanat yayıb.
Polisin açıqlamasında bildirilir: “Bu gün Norfolk bölgəsindən olan, altmış yaşlarında bir kişi dövlət vəzifəsində sui-istifadə şübhəsi ilə saxlanılıb. Berkşir və Norfolkdakı ünvanlarda axtarışlar aparılır. Həmin şəxs hazırda polis nəzarətində saxlanılır”.
BBC mənbələrinin bildirdiyinə əsasən, hadisə “Epşteyn sənədləri” ilə bağlı aparılan araşdırmada mühüm inkişaf fonunda baş verib. İddialara görə, Endryu Böyük Britaniyanın ticarət nümayəndəsi olduğu dövrdə bəzi sənədlərin məhkum olunmuş maliyyəçi və pedofil Ceffri Epşteynə ötürülməsi ilə bağlı şübhələr araşdırılır. Endryu indiyədək bütün ittihamları qətiyyətlə rədd edib. İstintaq davam edir. Onun saxlanılması keçmiş şahzadənin 66 yaşı tamam olduğu günə təsadüf edib.
Böyük Britaniya Kralı III Çarlz qardaşı Endryu Mauntbetten Vindzorun saxlanılmasından sonra açıqlama verib.
Bununla bağlı yayılan bəyanatda bildirilib ki, o, baş verənlərlə bağlı xəbəri dərin narahatlıqla qarşılayıb.
“İndi bu məsələ müvafiq şəkildə və səlahiyyətli qurumlar tərəfindən tam, ədalətli və düzgün prosedur əsasında araşdırılacaq. Daha əvvəl də qeyd etdiyim kimi, bu prosesdə tam və səmimi dəstəyimiz və əməkdaşlığımız olacaq. Açıq şəkildə bildirmək istəyirəm ki, qanun öz məcrasında və tam şəkildə icra olunmalıdır. Bu proses davam etdiyi müddətdə məsələ ilə bağlı əlavə şərh verməyim düzgün olmaz. Eyni zamanda ailəm və mən hamınıza xidmət və vəzifəmizi yerinə yetirməyə davam edəcəyik”,- deyə bəyanatda vurğulanıb.
İradə SARIYEVA
