İran və ABŞ arasında Omanın vasitəçiliyi ilə keçirilən dolayı danışıqların növbəti raundu Cenevrədəki Oman səfirliyində baş tutub. Görüşdən sonra həm İran, həm də ABŞ tərəfindən ardıcıl olaraq bəyanatlar verilib.
Adı açıqlanmayan Ağ Ev rəsmisi İranla danışıqlarda irəliləyiş əldə edildiyini, lakin müzakirə olunmalı bir çox detalların olduğunu bildirib. ABŞ rəsmisi əlavə edib ki, iranlılar iki həftə ərzində fikir ayrılıqlarını həll etmək üçün ətraflı təkliflərlə geri qayıdacaqlar.
İran xarici işlər naziri Seyid Abbas Araqçi isə ABŞ-la təmaslarda yeni bir mərhələyə çatdıqlarını deyib. İran xarici işlər naziri tərəflərin əsas prinsiplər üzrə ümumi razılığa gəldiyini və mümkün razılaşmaya doğru irəliləmə prosesinin başladığını bildirib: "Danışıqların ikinci mərhələsi bu gün Oman səfirliyində baş tutdu, baxmayaraq ki, danışıqlar dünən başlamışdı. Beynəlxalq Atom Enerjisi Agentliyinin (BAEA) baş direktoru Rafael Qrossi və ABŞ nümayəndə heyəti ilə yaxşı müzakirələr apardıq.
Bu mərhələdə əvvəlki mərhələ ilə müqayisədə daha ciddi məsələləri müzakirə etdik, dialoq daha konstruktiv keçdi. Mümkün razılaşma mətninə doğru irəliləmə prosesinin başlanması üçün rəhbər rolunu oynayacaq fundamental prinsiplər üzrə ümumi razılığa gəldik".
Arakçi həmçinin qeyd edib ki, bu, tez bir razılaşma əldə edildiyi anlamına gəlmir: "Məsələnin tez bağlandığını deyə bilmərik, amma danışıqlar yolu açılıb və irəliləyiş əldə edilib. İran üçün aydın və müsbət bir yol ortaya çıxıb. Hələ də üzərində işlənməli olan məsələlər var. Müxtəlif ideyalar irəli sürülüb və bu ideyalar ciddi şəkildə nəzərdən keçirilib. Nəticə olaraq, bundan sonra bu prinsiplərə uyğun olaraq irəliləyəcəyik."
Arakçi həmçinin Vaşinqtonla danışıqların üçüncü mərhələsinin tarixinin hələ müəyyən edilmədiyini deyib.
İran mediasının məlumatına görə, İran nümayəndə heyəti ballistik raketlər və uranın zənginləşdirilməsi ilə bağlı danışıqlardan yayınıb. Həmçinin iddia edilib ki, İran tərəfi amerikalıların Beynəlxalq Atom Enerjisi Agentliyinin nümayəndə heyəti ilə birlikdə nüvə obyektlərinin yoxlanılmasında iştirak etməsinə icazə verməkdən də yayınıb.
Tərəflərin Cenevrə danışıqlarında mümkün razılaşma üçün "rəhbər prinsiplər" barədə ümumi razılığa gəldiyi açıqlanıb. Lakin yerli medianın məlumatına görə, əsas məsələlərdə fikir ayrılıqları hələ də davam edir.
ABŞ mətbuatında yer alan xəbərlərə görə, İran nüvə danışıqlarında yeni təkliflər təqdim edib.
“Wall Street Journal” yazır ki, Tehran uran zənginləşdirmə fəaliyyətinin üç illik dayandırılmasını təklif edib. Həmçinin, zənginləşdirilmiş uranın bir hissəsinin xaricə, ehtimal ki, Rusiyaya göndərilməsi təklif edilib. İran həmçinin sanksiyalar qaldırılarsa, ABŞ-la gələcək ticarət razılaşmalarına açıq olduğunu da bildirib.
TAHİR
