ABŞ Ədliyyə Nazirliyi tərəfindən yayımlanan qalmaqallı sənədlər Trampın keçmiş Ağ Ev müşaviri Stiv Bennon və Epşteyn arasında yazışmaları da ortaya çıxarıb. CNN-in məlumatına görə, “Epşteyn işi” Vatikana qədər uzanır.
2019-cu ildə göndərilən mesajlardan Bennonun Papa Fransiskə qarşı müxalif mövqedə olduğu və Papanı devirmək istədiyi aydın olur. Bennon bu müsajı Ağ Evdəki vəzifəsindən ayrıldıqdan sonra göndərib.
Bennonun 2019-cu ilin iyun ayında Epşteynə göndərdiyi məktubda "(Papa) Fransiski devirəcəyəm. Klintonlar, Si, Fransisk, AB - yaxşı, qardaş" yazdığı bildirilir.
Bennon Papa Fransiski əvvəllər sərt tənqid edib. 2018-ci ildə Bennon Papa Fransiski düşmən elan edib və “The Spectator”a verdiyi müsahibədə onu "alçaq" adlandırıb.
Açıqlanan sənədlər göstərir ki, Bannonun Roma Papasını zəiflətmək üçün Epşteynlə müxtəlif yazışmaları olub.
Bannon Roma və Vatikana böyük əhəmiyyət verib. O, hətta Romada bir ofis açıb və orada Yəhudi-Xristian dəyərlərini qorumaq və müdafiə etmək məqsədilə siyasi təlim verən "qladiator məktəbi" yaratmağa çalışıb. Papanın əsas mövqeyi isə millətçiliyi tənqid etmək və immiqrantları müdafiə etmək olub.
Epşteyn 1 aprel 2019-cu ildə ona "Vatikanın gizli otağında" adlandırdığı elektron məktub göndərib. Daha sonra Bannona "Papa Fransisk, yoxsa Stiv Bannon? Katoliklər seçim etməlidirlər" başlıqlı məqalə göndərib. Bannon isə bu məktuba "asan seçim" cavabını verib.
"Vatikanın gizli otağı" Frederik Martel tərəfndən yazılan və Vatikan daxilində korrupsiyanı araşdıran kitabdır. Kitabda Katolik Kilsəsi daxilində güc münasibətləri, homoseksuallıq, cinsi istismar halları və bir çox digər məsələlərə toxunulur.
Xatırladaq ki, Bennon 2016-cı il seçkilərində Trampın kampaniyasına rəhbərlik edib və prezidentliyinin ilk yeddi ayı ərzində Ağ Evin baş strateqi və müşaviri vəzifəsində çalışıb.
TAHİR
