Hindistan neft emalı zavodları mart-aprel aylarında çatdırılması üçün Rusiya neftini almaqdan yayınırlar. Bu barədə "Reuters" agentliyi məlumat yayıb.
Nəşr qeyd edir ki, Hindistan şirkətləri Rusiya nefti ilə sövdələşmələrdən yayınmağı davam etdirməyi planlaşdırırlar. Agentliyin mənbələrinə görə, bu addım Nyu-Dehlinin Vaşinqtonla ticarət razılaşmalarını əldə etməsinə kömək etmək məqsədi daşıyır. "Indian Oil", "Bharat Petroleum" və "Reliance Industries" şirkətləri artıq mart ayı üçün bir sıra Rusiya enerji tədarükünü planlaşdırıblar, lakin onlar erkən yaz üçün yeni müqavilələr bağlamırlar. Agentlik qeyd edir ki, digər neft emalı zavodlarının əksəriyyəti Rusiya neftini almağı dayandırıb.
Xatırladaq ki, ABŞ 7 fevral tarixindən etibarən Rusiya neftindən imtina etməsinə görə Hindistandan idxal edilən mallara tətbiq edilən əlavə 25% rüsumu ləğv edib. Mənbələr əlavə ediblər ki, Hindistan zavodları planlarını dəyişə və Rusiya neftinə sifarişləri yalnız hökumətin tövsiyəsi əsasında bərpa edə bilərlər.
Donald Trampın sərəncamında qeyd olunur ki, Amerika rəsmiləri vəziyyəti izləyəcək və Hindistan Rusiyadan neft alışını bərpa edərsə, gömrük rüsumlarının yenidən tətbiqini tövsiyə edəcəklər. Mənbələr bildirir ki, dünyanın üçüncü ən böyük neft istehlakçısı və idxalçısı olan Hindistanın Rusiya neftini idxalı dekabr ayında son iki ilin ən aşağı səviyyəsinə düşüb. Hindistan Xarici İşlər Nazirliyinin sözçüsü jurnalistlərin sorğusuna cavab olaraq deyib: "Enerji mənbələrimizi obyektiv bazar şərtlərinə və dəyişən beynəlxalq dinamikaya uyğun olaraq şaxələndirmək strategiyamızın əsasını təşkil edir". Tramp isə əvvəllər Vaşinqton və Yeni Dehlinin Hindistanın ABŞ-dan və ola bilsin ki, Venesueladan neft almağa başlayacağı barədə razılığa gələcəyini bildirmişdi.
Tahir TAĞIYEV
